Граѓаните им должат на банките 4,5 милијарди евра, растат потрошувачките и станбените кредити

Народната банка го објави најновиот Извештај за монетарните движења во државата кој се однесува на месец декември 2025 година.

Анализирано на годишно ниво, вкупните депозити се зголемени за 10,1%, во поголем дел поради растот на депозитите на секторот „домаќинства”, при раст и на депозитите на корпоративниот сектор.

На годишна основа, вкупните кредити се зголемени за 13,0%, како резултат на растот на кредитите кај двата сектора, со малку поизразен придонес на корпоративниот сектор.

Во декември, кредитите на домаќинствата, забележаа месечно и годишно зголемување од 0,9% и 10,9%, соодветно поради растот на кредитирањето во денари и во странска валута, со поголем придонес на кредитите во денари.

Граѓаните во банките должат околу 4,5 милијарди евра.

Анализирано според намената на кредитите одобрени на физичките лица, во декември, најзастапените категории, потрошувачките и станбените кредити, бележат месечен раст од 1,4% и 1,7%, соодветно, при годишен раст од 10,6% и 15,8%, соодветно. Овој месец, автомобилските кредити се намалени за 2,1% на месечна основа, додека на годишна основа остварија раст од 1,3%.

Кредитите одобрени на кредитните картички, во декември, забележаа месечен и годишен пад од 1,0% и 5,5%, соодветно. Во декември, негативните салда на тековните сметки и кредитите одобрени врз други основи, бележат месечно намалување од 16,4% и 1,4%, соодветно, при годишен пад од 2,5% и 11,4%, соодветно.

Вкупните депозити на домаќинствата, во декември, се повисоки за 3,6% на месечна основа. Притоа, промената речиси во целост се должи на растот на депозитните пари, при помал раст и на краткорочните депозити, додека долгорочните депозити забележаа намалување.

Анализирано на годишна основа, растот изнесува 12,1% и во најголем дел е резултат на зголемувањето на депозитните пари, долгорочните депозити во денари и на краткорочните депозити во странска валута.