Skip to content
Зимата повторно станува линија на фронт за Украина, овојпат преку уништување на струјата и греењето. Во такви услови, ЦИВИЛ – Центар за слобода, во координација со Амбасадата на Украина, започна јавна кампања за солидарност под назив „Топлина за Украина“, по апел на украинскиот министер за надворешни работи Андриј Сибиха.
Пораката е јасна: кога енергетската инфраструктура е под постојани напади, најранливи се семејствата и децата, кои се принудени да ја поминуваат зимата во екстремни услови, без сигурно греење и без стабилно електроснабдување. Кампањата го поставува прашањето како обврска на обичната човечка одговорност – „од луѓе за луѓе, преку граници“ – и ја повикува јавноста да помогне таму каде што помошта најдиректно значи опстанок.
Фокусот е на хуманитарна, практична поддршка: набавка на генератори и неопходна енергетска опрема, донации наменети за обезбедување генератори и за поддршка на енергетскиот систем на Украина, како и ширење на информацијата за кампањата за да се мобилизира поширока мрежа на солидарност. Организаторите нагласуваат дека иницијативата не е само прибирање средства, туку став дека „зимскиот терор“ не смее да ја скрши човечката солидарност.
Информациите за начинот на вклучување се објавени на платформите на ЦИВИЛ, каде се споделуваат насоки за придонес и за поддршка на кампањата.