Skip to content
Размена на 314 воени заробеници договорија Украина и Русија по дводневни разговори во Абу Даби под посредство на САД, а размената беше реализирана денес, со по 157 лица од двете страни, како прв ваков чекор по повеќемесечна пауза.
Украинскиот претседател Володимир Зеленски ја потврди размената кусо по завршувањето на разговорите, наведувајќи дека меѓу вратените 157 Украинци има припадници на Армијата, Националната гарда и Државната гранична служба, а во групата биле ослободени и цивили. Тој посочи дека „повеќето од нив се во заробеништво од 2022 година“ и оцени дека „денешната размена доаѓа по долга пауза и критично е што успеавме да ја реализираме“.
Американскиот специјален пратеник Стив Виткоф исто така ја потврди размената, оценувајќи дека резултатот произлегол од „детални и продуктивни“ разговори и дека ваквите чекори покажуваат дека континуираниот дипломатски ангажман може да даде опипливи резултати, иако, како што нагласи, останува „значајна работа“ за поширок договор за крај на војната.
Според Ројтерс, со договорот за размената, двете страни се согласиле и да продолжат со преговорите наскоро, но клучните прашања остануваат отворени, особено околу територијалните барања и моделот на безбедносни гаранции по евентуален прекин на огнот.
Истовремено, проценките од повеќе извори се дека размената е важен тест за доверба во процесот, затоа што последните месеци имаше јавни меѓусебни обвинувања дека механизмот е закочен и дека политичката волја не е доволна за да се одржи континуитет.