Skip to content
Меркел нема да се кандидира за германски претседател, соопшти нејзиниот кабинет во Берлин денес, откако во германската јавност се појавија шпекулации дека поранешната канцеларка би можела да влезе во трката за шеф на државата на изборите во 2027.
Шпекулациите се разгореа по медиумски наводи дека во врвот на ЦДУ постои загриженост оти Зелените би можеле да ја предложат Меркел како кандидатка за претседателската функција, со што би се отворил политички чувствителен простор за актуелното раководство на конзервативците. Кабинетот на Меркел јавно ја отфрли можноста, оценувајќи ја идејата како неоснована.
И од Зелените стигна демант. Според изјави пренесени од германски медиуми, од партијата велат дека нема конкретни планови или одлуки за кандидатура од ваков тип, а во јавноста беше пренесена и пораката дека „нема ништо од тоа“.
Контекстот е дека претседателот на Германија се избира во Федералното собрание, тело составено од пратениците во Бундестагот и ист број делегати избрани од покраинските парламенти, кое заседава само за таа намена. Сегашниот претседател Франк-Валтер Штајнмајер е во втор и последен мандат што истекува на 18 март 2027 година, па изборот на наследник треба да се случи пред тоа.
Дополнително „масло на огнот“ за гласините, според дел од медиумите, беше и најавата дека Меркел ќе се појави на партиски конгрес на ЦДУ во Штутгарт на 20 февруари 2026 година, првпат по завршувањето на нејзиниот канцеларски мандат, што во јавноста беше протолкувано како редок сигнал за поголема политичка видливост