Skip to content
Властите во Сенегал и Франција разоткрија организирана мрежа за сексуална злоупотреба која, според истражителите, функционирала на релација меѓу северна Франција и западна Африка. Операцијата е резултат на повеќемесечна координација меѓу безбедносните служби на двете земји, а истрагата и натаму е во тек.
Според информации објавени од францускиот весник „Монд“, сенегалската полиција привела 14 лица осомничени за сериозни кривични дела, меѓу кои групна сексуална злоупотреба на малолетници, подведување и силување на момчиња на возраст од околу 15 години. Дел од осомничените се товарат и за намерно изложување на здравствени ризици преку незаштитени односи.
Центарот на европската траса на мрежата, според наодите, бил градот Бове во Франција, додека африканскиот крак водел кон Сали, познат туристички град во Сенегал. Истражителите наведуваат дека осомничените дејствувале координирано и подолг временски период, со јасно поделени улоги.
Во истрагата што ја водело француското одделение за криминалистички истраги, сите досега приведени се државјани на Сенегал. Според наводите од истражните органи, дел од осомничените имале улога на посредници и регрутери, додека други директно учествувале во злоупотребите. Одредени осомничени, како што пренесуваат медиумите, ги признале делата и изјавиле дека дејствувале по насоки од лице со француско државјанство, за што добивале пари.
Истражителите исто така утврдиле дека дел од кривичните дела биле документирани со видео-снимки, што дополнително ја отежнува тежината на случајот. Овие материјали сега се предмет на форензичка анализа.
Француските власти работат на утврдување на улогата на наводниот организатор од Франција, како и на идентификација на потенцијални соучесници. Не се исклучува можноста за нови апсења.
Овој случај повторно ја отвори темата за прекуграничниот криминал и експлоатацијата на ранливи категории, особено малолетници. Организациите за заштита на деца апелираат за посилна меѓународна соработка и превентивни механизми за рано откривање на вакви мрежи.