Флај Дубаи летна за Скопје, летот го следат 7.164 луѓе во живо

Флај Дубаи летна за Скопје денеска попладне, а летот од Дубаи до скопскиот аеродром во еден момент на Flightradar24 го следеа 7.164 луѓе во живо. Според јавно видливите податоци на платформата, авионот полетал со задоцнување од околу половина час, а пристигнувањето во Скопје е проценето за вечерва.

Засиленото внимание кон линијата Дубаи–Скопје доаѓа во момент кога почнува евакуацијата на македонски државјани од Блискиот Исток. Министерството за надворешни работи и надворешна трговија, објави дека евакуацијата ќе се реализира со комерцијални чартер-летови, додека премиерот Христијан Мицкоски изјави дека првата група македонски граѓани што треба да биде евакуирана денеска ќе отпатува од Дубаи кон Скопје.

Токму затоа, редовниот лет од Емиратите кон македонската престолнина денеска се следи со далеку поголемо внимание од вообичаеното, бидејќи јавноста го поврзува со пошироката операција за враќање на македонски државјани од регионот. Според последните податоци што ги објави МНРиНТ, Амбасадата во Абу Даби ја контактирале 585 лица кои престојуваат во Обединетите Арапски Емирати, како и уште десетици лица од Кувајт, Бахреин и Саудиска Арабија, додека во Доха се пријавиле 150 македонски државјани, од кои 95 изразиле подготвеност за евакуација.

Министерството соопшти и дека веќе е склучен договор со авиокомпанија и дека, според утврдениот план, до средината на следната недела се очекува да бидат евакуирани сите македонски државјани кои изразиле подготвеност за враќање. Тоа значи дека вниманието околу летовите од Персискиот Залив кон Скопје, најмалку во наредните денови, веројатно ќе остане високо.