Вучиќ: Пицула и Хрватите се однесуваат како кога се бореа со оружје против Србите

Српскиот претседател Александар Вучиќ изјави дека известувачот на Европскиот парламент за Србија, Тонино Пицула, и Хрватите се однесуваат на ист начин како кога „држеа оружје и се бореа против српскиот народ“.

„Мислам дека г-дин Пицула и нашите хрватски соседи секогаш зборуваат многу повеќе за себе отколку за мене. Доаѓате со наводно добри намери, но всушност вашата единствена намера е да ја продолжите оваа борба со други средства, на начинот на кој се однесувавте кога држевте оружје и се боревте против српскиот народ. Ние многу добро разбираме што прават и не ме вознемируваат особено неговите зборови“, рече Вучиќ.

Според него, во врска со обвинувањата за авторитаризам и автократија, „доволно е да се погледнеме во огледало и сè ќе стане јасно“.

„Луѓе кои не се во можност да прифатат едноставен факт што ќе ви го кажам затоа што не сакаат да ве чујат, не сакаат да ве слушаат – можевте да го видите тоа во хрватските медиуми во последните седум дена, дури и кога ги покануваат некои од овие внатрешни блокатори да дадат изјави, кои им ги даваат за да објаснат како Хрватска е светско чудо и што уште не. Забележавте дека тие инсистираат дека Србија не пронашла голем број исчезнати лица, но никој не им кажал, ниту од тука ниту од таму, а јас им кажав стотици пати – се однесуваат како да не го слушнале тоа“, рече српскиот претседател.

Тој додаде дека Меѓународниот комитет на Црвениот крст во Женева обезбедил податоци за ова прашање.

„Има повеќе исчезнати Срби отколку исчезнати Хрвати, а секој ден слушам само за исчезнати Хрвати. Според официјалните податоци, на територијата на Хрватска има околу стотина исчезнати Срби повеќе од вкупниот број исчезнати Хрвати, но овие исчезнати Срби веројатно не се луѓе, поради што никој од нивната земја никогаш не ги споменува. Можете да зборувате колку сакате – едноставно нема смисла, не им е гајле. Ние сме виновни за фактот што исчезнатите Хрвати не се пронајдени, а камоли што има повеќе исчезнати Срби. Ова се официјални податоци од Црвениот крст во Женева, а не од Александар Вучиќ, прифатени од двете земји“, рече тој.

Вучиќ додаде дека се прават обиди „на кој било начин да се запре Србија“.

„Ја разбираме нивната политика – не е многу успешна, но ако сакаат да продолжат, ќе продолжат. Што се однесува до личните проценки – би бил загрижен ако г-дин Пицула каже нешто добро за мене. Кога ќе каже нешто лошо, јас сум задоволен – тоа значи дека правам добра работа за Србија и мојот народ. Дури и не ми требаат награди – кога оние што ја мразат Србија ме критикуваат толку жестоко, тоа е најголемата пофалба за мене“, рече претседателот.