Skip to content
Во кус разговор за Рацин.мк, популарниот Игор Џамбазов ја корегира информацијата дека го купил ФК Дојранско Езеро и појаснува точно за што станува збор.
„Не е баш дека сум го купил. Станав претседател на клубот, на кој му е потребно освежување во управувачката структура, засилување на играчкиот кадар и враќање на старите, успешни времиња кога ФК Дојранско езеро играше во втората македонска лига“, изјави за нашиот онлајн медиум Џамбазов.
Тој вели дека е свесен дека ќе има многу работа и дека е подготвен да го прифати предизвикот. Ја истакнува поддршката на општината и на градоначалникот на Дојран.
„Ќе има многу работа. Општината и градоначалникот ни излегоа во пресрет, ќе имаме нивна поддршка, но јас како претседател ќе морам да побарам помош и од локалните фирми, но и од некој од големите, познати македонски брендови“, посочува Џамбазов.
Во разговорот со него тој открива уште една голема мотивација за овој негов чекор.
„Ова го правам од љубов и кон Дојран, но особено кон клубот во кој кариерата ја заврши мојот голем пријател, легендарниот Благој Истатов. Се надевам дека ќе бидам успешен во сето она што го замислив и си го поставив како цел“, нагласи Џамбазов во разговорот.
Игор Џамбазов веќе подолго време живее во Дојран и дојранчани веќе одамна го препознаваат како посветен сограѓанин кој на повеќе начини ја помага и афирмира локалната заедница во повеќе аспекти.