Skip to content
Европа конечно доби решение за една од своите најдолготрајни и најнеизвесни вселенски мисии – роверот „Розалинд Френклин“ ќе биде лансиран кон Марс кон крајот на 2028 година.
Лансирањето ќе го реализира SpaceX со ракетата Falcon Heavy, во соработка меѓу NASA и European Space Agency. Со тоа се става крај на долгата потрага по партнер, откако претходната соработка со Русија беше прекината по инвазијата врз Украина.
Децении одложувања и политички пресврти
Проектот за европски ровер датира уште од крајот на 90-тите години, но низ времето се соочи со бројни пречки – од повлекување на NASA поради буџетски ограничувања, до подоцнежната зависност од руската агенција Roscosmos.
По раскинувањето на партнерството со Москва во 2022 година, и покрај веќе подготвените компоненти, мисијата остана „заглавена“ на Земјата.
Нов договор меѓу Европа и САД беше постигнат во 2024 година. Американската страна обезбедува лансирање и клучни технологии за слетување, додека европската индустрија го презеде развојот на новата платформа.
Во проектот се вклучени компании како Airbus, OHB и Thales Alenia Space, кои работат на финалната интеграција на мисијата.
Потрага по живот на Марс
Роверот „Розалинд Френклин“ има амбициозна научна цел – да бара траги од древен живот под површината на Марс. Тој ќе може да дупчи до два метра длабочина, каде што органските молекули се заштитени од радијација.
Целта на слетување е регионот Oxia Planum, за кој научниците веруваат дека некогаш имал услови погодни за живот.
Доколку сè оди според планот, роверот ќе пристигне на Марс во 2030 година – по речиси четврт век развој, одложувања и геополитички пресврти.