Од вторник Македонија под студен бран: Дожд, град и снег

По неколку дена релативно топло пролетно време, Македонија од ноќта кон вторник влегува во период на посвежо и нестабилно време, со пад на температурите, локални врнежи од дожд и услови за снег на повисоките планински места. Промената доаѓа со продор на постуден воздух од север, по што дневните температури во делови од земјата ќе бидат пониски за повеќе од 10 степени во споредба со претходните денови.

Во понеделник времето ќе биде променливо облачно со сончеви периоди, а од пладневните часови ќе има услови за локален дожд, краткотраен пороен дожд и ретки грмежи. Повеќе облаци и врнежи се очекуваат од вторник, кога заладувањето ќе се почувствува поизразено, особено во северните, западните и повисоките делови од земјата.

Покрај дождот, времето ќе биде проследено и со ветер, што дополнително ќе го зголеми чувството на студ. Во пониските места врнежите ќе бидат претежно од дожд, додека на планините се очекува премин во снег, особено таму каде што температурите ќе се спуштат поблиску до нулата.

Најизразено заладување се гледа во среда, кога во западните и југозападните делови дневните температури ќе се движат околу 10 до 12 степени, а утринските во повисоките места ќе се спуштат до 1 или 2 степени. Во Скопје, по топлите 22 степени во понеделник, во вторник дневната температура ќе падне на околу 16 степени, со можни врнежи во попладневните часови.

Во четврток се очекува постепено стабилизирање, но утрата ќе останат студени, особено во западните, северните и планинските предели. Температурите преку ден ќе останат под нивото од претходниот топол период, со повеќе сонце во дел од земјата и помалку услови за врнежи.