Внимателно на патиштата, обилниот дожд предизвика одрони

Обилните врнежи од дожд предизвикаа помали, но чести одрони од земја и камења на повеќе патни правци во дебарскиот регион, поради што надлежните апелираат до возачите да возат внимателно и да ја прилагодат брзината на условите на патот.

Од дебарската секција на Јавното претпријатие за одржување на магистрални и регионални патишта информираат дека екипите се постојано на терен и ги расчистуваат коловозите за да се одржи безбеден сообраќај. Според нив, најголем ризик има поради влажните коловози и одроните што се појавуваат почесто по интензивни врнежи.

Критични точки се регистрирани на патниот правец Дебар – Маврово, особено околу селата Рајчица, Косоврасти и Јанче, кај Ростушки Мост, во близина на Бигорскиот манастир и кај месноста „Сенечки Ливади“. Одрони има и на правецот кон Струга, кај месноста „Три Чешми“ во Манастирец.

Екипите ја следат состојбата на околу 110 километри патишта под нивна надлежност, вклучувајќи ги и делниците кон граничниот премин „Блато“, кракот кон Бошков Мост и патот Мелнички Мост – Центар Жупа.

АМСМ дополнително предупредува дека сообраќајот на државните патишта се одвива по влажни коловози, а посебна внимателност се препорачува на делници низ котлини, речни долини и клисури, каде што ризикот од одрони е поголем. Како ризични правци се посочуваат Катланово – Велес, Маврово – Дебар – Струга, Виница – Берово и Кочани – Делчево.

Возачите треба да избегнуваат нагло кочење, да држат поголемо растојание меѓу возилата и да не ги потценуваат делниците каде што на коловозот може да има земја, камења или вода. По обилни дождови, одроните може да се појават и по расчистување на патот, особено на засечени и планински делници.