Објавена е пораката на Епштајн напишана пред да се самоубие

Федерален судија во САД ја декласификуваше наводната самоубиствена порака напишана од Џефри Епштајн, што е првпат документот да биде објавен јавно, објави Гардијан.

Николас Тартаљоне, цимер на Епштајн во Метрополитен поправниот центар во Њујорк, тврди дека ја открил белешката по неуспешниот обид за самоубиство на Епштајн во јули 2019 година, само неколку недели пред финансиерот да биде пронајден мртов во неговата ќелија.

„Ме испитуваа со месеци – НЕ НАЈДОА НИШТО!!!“ пишува во белешката. „Задоволство е да се избере кога да се збогува. Што сакате да направам – да се расплачам!! НЕМА ЗНАЧЕЊЕ – НЕ ВРЕДИ!!“

Писмото е непотпишано.

Гардијан забележува дека не можел независно да потврди дали текстот всушност е напишан од Епштајн. Министерството за правда на САД не одговори веднаш на барањето за коментар.

Документот беше декласифициран откако Њујорк Тајмс објави за неговото постоење и побара од судот во Вајт Плејнс, Њујорк, да го објави.

Тартаљоне, поранешен полицаец, отслужува доживотна казна затвор за четирикратно убиство на кое се жали. Тој беше оној што го пронашол Епштајн во несвест во нивната ќелија. По инцидентот, осрамотениот финансиер им кажал на затворските службеници дека бил нападнат од Тартаљоне, покажуваат федералните документи. Во неделите пред неговата смрт, Епштајн постојано негирал какви било намери за самоубиство.

Според „Њујорк тајмс“, откако Тартаљоне ја добил белешката, им ја дал на своите адвокати како можна одбрана од идните обвиненија за напад од страна на Епштајн. Адвокатите, исто така, ангажирале графолози за да ја потврдат автентичноста на ракописот.

Во 2019 година, медицинскиот испитувач од Њујорк официјално ја прогласи смртта на Епштајн за самоубиство. Сепак, неговите блиски врски со влијателни и богати личности продолжуваат да поттикнуваат бројни теории на заговор околу околностите на неговата смрт.