Патниците од крузерот со хантавирус се разотидоа низ светот: во тек е глобална потрага по контакти

Здравствените власти од повеќе држави започнаа меѓународна потрага и следење на патниците од крузерот „MV Hondius“, откако дел од нив се разотидоа низ светот пред официјално да биде потврдена појавата на хантавирус на бродот, што дополнително ја зголеми загриженоста околу можноста за ширење на реткиот вирус. 

Според информациите, најмалку 29 патници од 12 држави се симнале од крузерот на островот Света Елена уште пред здравствените власти да го потврдат избувнувањето на инфекцијата. Дел од нив отпатувале кон Европа, САД, Азија и Африка, поради што сега се спроведуваат итни проверки, тестирања и следење на контакти во повеќе земји. 

Крузерот „MV Hondius“, кој испловил од Аргентина на почетокот на април, се најде во центарот на светското внимание откако на бродот беа регистрирани случаи на тежок респираторен синдром поврзан со андскиот сој на хантавирус – редок вид кој во исклучителни ситуации може да се пренесува и меѓу луѓе преку многу близок контакт. 

Досега се потврдени неколку случаи на инфекција, а три лица починаа, меѓу кои холандски брачен пар и германски државјанин. Дел од заболените се лекуваат во болници во Јужна Африка, Холандија и Швајцарија, додека уште неколку случаи се под истрага. 

Дополнителна загриженост предизвика информацијата дека дел од патниците не биле веднаш информирани за можната изложеност на вирусот, поради што здравствените служби сега се обидуваат ретроактивно да ги реконструираат нивните движења и контактите што ги имале по напуштањето на бродот.

Светската здравствена организација соопшти дека ризикот за пошироката јавност засега останува низок и дека ситуацијата не може да се споредува со пандемијата на ковид-19, но предупреди дека се потребни дополнителни тестирања, изолација на сомнителните случаи и внимателно следење на контактите поради долгата инкубација на вирусот, која може да трае и до шест недели. 

Во меѓувреме, крузерот продолжува кон Канарските Острови, каде што патниците ќе бидат подложени на медицински контроли и дополнителни процедури пред враќање во своите матични земји.