Skip to content
Македонската театарска и музичка сцена деновиве е во исчекување на премиерата на мјузиклот „Као Какао“, амбициозен авторски проект инспириран од музиката на легендарниот македонски гитарист и композитор Влатко Стефановски. Премиерните изведби се закажани во Македонски народен театар, а проектот уште пред своето сценско деби веќе е препознаен како потенцијален културен производ со регионално значење.
Станува збор за прв македонски мјузикл создаден врз музичкиот опус на Стефановски и култната група Леб и сол. Автор на текстот е Венко Андоновски, режијата ја потпишува Дејан Пројковски, кореографијата е на Олга Панго, додека новите музички аранжмани ги работи Бобан Мирковски. Во мјузиклот ќе бидат вклучени 19 песни од богатата кариера на Стефановски, кои ќе добијат нова драмска и сценска форма.
Режисерот Дејан Пројковски истакнува дека пред тимот стои предизвик да се создаде дело што ќе комуницира и локално и регионално.
„Работиме на мјузикл кој ќе има свој јазик, своја емоција и свој идентитет. Нашата амбиција е да создадеме претстава што ќе ја задржи публиката, но и ќе отвори простор за нови сценски искуства кај нас. Предизвикот е да се најде точниот баланс меѓу емоцијата и формата и да се создаде театар што е жив, непосреден и искрен, а истовремено прецизно структуриран. Премиерата е само почеток на еден подолг живот на овој проект“, вели Дејан Пројковски.
Самиот Влатко Стефановски признава дека идејата за мјузикл базиран на неговата музика кај него предизвикала љубопитност и возбуда, но и внимателност. „Зошто да не? Подобро да бидам сведок на тоа, отколку да се прави кога ќе ме нема“, изјави Стефановски во една од најавите за проектот, потенцирајќи дека денес внимателно избира зад кои идеи застанува.
Неговата поддршка за „Као Какао“ се доживува како силна потврда дека станува збор за сериозен и внимателно осмислен проект.
Според најавите на авторскиот тим, „Као Какао“ нема да биде класичен биографски мјузикл, туку сценска приказна што преку музиката на Стефановски ќе го оживее духот на едно време, урбаното Скопје, балканската емоција и универзалните теми на љубовта, припаѓањето и генерациската меморија. Токму затоа проектот уште пред премиерата се опишува како современ културен настан што може да комуницира и со публика надвор од Македонија.
Во јавноста веќе се коментира дека музиката на Стефановски е природна основа за ваков тип сценско дело. Неговите композиции одамна ги надминале националните граници и претставуваат препознатлив балкански музички код, преполн со емоција, виртуозност и културна автентичност. Токму тој универзален музички јазик е причината поради која авторите веруваат дека „Као Какао“ може да биде препознаен како „исклучителен извозен културен производ“ на македонската сцена.
Во пресрет на премиерата, интересот на публиката е исклучително голем, а очекувањата се дека мјузиклот ќе претставува редок спој на театар, рокенрол и колективна носталгија. За многумина, ова не е само нов сценски проект, туку и омаж на една музика што со децении е дел од културниот идентитет на Македонија и Балканот.
