Skip to content
26 дена молк од градоначалникот на Карпош, Сотир Лукровски, ја држат една од најголемите скопски општини во политичка и институционална неизвесност, додека јавноста сè уште нема директно објаснување од избраниот функционер што се случува со неговото отсуство, до кога ќе трае и како ќе функционира општината во периодот додека тој не е на работното место.
Случајот почна да се отвора откако во јавноста се појавија информации дека Лукровски се повлекува од функцијата. Општина Карпош на 8 мај ги демантираше тие наводи и соопшти дека градоначалникот нема поднесено оставка, туку користи боледување и е привремено отсутен поради здравствени причини. Од општината тогаш порачаа дека институцијата продолжува да функционира непречено, а надлежностите привремено ги извршува членот на Советот, Неделчо Крстевски.
Но, по речиси еден месец, проблемот веќе не е само дали има или нема оставка. Прашањето е зошто избраниот градоначалник нема ниту јавна објава, ниту статус, ниту директно обраќање до граѓаните што го избрале да ја води општината. Здравствената состојба е приватна работа и дијагнозата не смее да биде предмет на јавна расправа, но функционирањето на јавна институција, времетраењето на отсуството и линијата на одговорност се прашања од јавен интерес.
Министерот за локална самоуправа Златко Перински дополнително ја отвори дилемата кога изјави дека Министерството не добило известување од Општина Карпош дека Лукровски поднел оставка. Тој објасни дека градоначалник оставка не поднесува во Министерството, туку во општината, која потоа е должна да го извести ресорното министерство.
Токму тука се појавува институционалната празнина. Формално, Лукровски останува градоначалник. Практично, надлежностите ги извршува друго лице. Политички, Карпош живее во состојба во која граѓаните не знаат дали станува збор за кратко боледување, подолга неможност за извршување на функцијата или за криза што се одложува со молк.
Опозицијата веќе побара вонредна седница на Советот, со образложение дека јавноста мора да знае кој управува со општината, што се случува со проектите, каква е финансиската состојба и дали локалната власт работи со полн капацитет. Власта, пак, засега инсистира дека нема ништо спорно во привременото пренесување на надлежностите.
Но, политичката одговорност не се исцрпува со формално соопштение. Градоначалникот е директно избран функционер, а не службеник чие отсуство може да се покрие само со административна замена. Карпош не бара медицински детали, туку јавна сигурност дека општината има стабилно управување и јасна одговорност.
Додека тоа не се случи, молкот на Лукровски останува погласен од секое соопштение.
