Бројот на жртви од разорните земјотреси во Венецуела се искачи на 1.450

Бројот на жртви од разорните земјотреси во Венецуела се искачи на 1.450, изјави денес високиот венецуелски функционер Хорхе Родригез.

Зборувајќи на државната телевизија, Родригез рече дека бројот на повредени достигнал 3.150 и дека 12.721 семејства се погодени, објави Скај њуз.

Според него, вкупно 774 згради се оштетени или уништени.

Од нив, 189 згради претрпеле целосна штета, додека 585 се делумно оштетени.

Меѓу погодените објекти се 38 болници, а Родригез рече дека властите брзо работат на нивна обнова.

Тој додаде дека досега им е обезбедена помош на 73.937 семејства, додека повеќе од 7,2 милиони килограми храна се дистрибуирани до населението.

Обединетите нации вчера објавија дека речиси 1.500 згради се оштетени во силните земјотреси што ја погодија северна Венецуела и дека повеќе од 3.100 семејства се раселени.

Според извештајот, земјотресите погодиле најмалку седум федерални држави во Венецуела, а локалните власти пријавиле повеќе од 430 последователни потреси, објави Скај њуз.

Нов земјотрес со интензитет од 4,5 степени е регистриран во Јаракуја на север од Венецуела, додека земјотрес со интензитет од 4,8 степени претходно е регистриран во Карипското Море, околу 70 километри западно од Каракас.

Спасувачите извлекоа татко и син од урнатините четири дена по земјотресот

Татко и син се спасени од урнатините на срушена зграда во венецуелската држава Ла Гваира, четири дена откако разорните земјотреси ја погодија земјата.

Двајца мажи, видливо исцрпени и со заштитни маски на лицата, беа изнесени на импровизирани носилки, објави Ројтерс.

Ла Гваира е најтешко погодената област по земјотресите во средата, во кои загинаа најмалку 1.450 луѓе, додека илјадници сè уште се водат како исчезнати.

Спасувањето на таткото и синот следеше по 12-часовна сложена операција за време на која тимовите користеа специјализирани камери за пребарување.

Во спасувачките операции учествуваат членови на француската цивилна одбрана и американскиот тим за пребарување и спасување од округот Ферфакс, Вирџинија, кои ги извлекоа мајката и нејзиното деветмесечно бебе од урнатините претходниот ден.

Член на француската цивилна заштита изјави дека и таткото и синот се многу ослабени, откако поминале четири дена под урнатините.

Најмалку 33 лица беа спасени во текот на викендот, но десетици илјади луѓе сè уште се водат како исчезнати.

Експертите предупредуваат дека по 72 часа од земјотресот, шансите да се најде живо лице под урнатините нагло се намалуваат.