Skip to content
Судењето против Трајко Бојковски, обвинет за серија убиства и обиди за убиство на жени во Кумановско, денеска во Основниот суд во Куманово почна во тензична атмосфера и со прекин уште на стартот на рочиштето, јави новинарката Симовска од Слободен Печат. која го следи судењето.
Обвинетиот, кој беше спроведен од притвор, не одговарал на прашањата на судијата, ниту на основното прашање за утврдување на идентитетот. Според известувањето од судницата, тој гледал кон таванот, не воспоставувал комуникација со судот и не одговарал дали се вика Трајко Бојковски.
Поради таквото однесување, судијата дал кратка пауза за да се процени дали постојат услови рочиштето да продолжи. Во судницата биле присутни и дел од семејствата на оштетените, кои реагирале на однесувањето на обвинетиот и довикувале дека тој се преправа.
На почетокот на постапката било соопштено дека адвокат на обвинетиот е Драган Трајковиќ. Во судницата присуствувале и полномошници на оштетените семејства на Јанка Антевска, Мира Станковска, Марија Мариновска и Росанка Трајковска.
Обвинителството во Куманово на 19 јуни поднесе обвинителен акт против Бојковски од Старо Нагоричане. Тој се товари за четири кривични дела убиство и два обиди за убиство на жени во Кумановскиот Регион. Доколку обвинението се докаже, за делата што му се ставаат на товар е предвидена казна затвор од најмалку 10 години или доживотен затвор.
Според обвинителството, првото убиство за кое е обвинет било извршено на православен Бадник во 2025 година во селото Клечовце. Второто, според обвинителниот акт, се случило меѓу 5 и 7 јуни 2025 година во селото Драгоманце. Третото дело за кое се товари е во Старо Нагоричане, меѓу 17 и 18 јануари 2026 година, а четвртото во селото Челопек, во ноќта меѓу 5 и 6 февруари годинава.
Обвинителството го товари Бојковски и за два обиди за убиство. Едниот, според обвинението, се случил на 22 јули 2025 година во Челопек, кога нападнатата жена успеала да го заплаши и да преживее. Вториот евидентиран настан е од 9 февруари 2026 година, исто така во Челопек, кога обвинетиот, според обвинителството, се откажал од намерата откако слушнал звук и побегнал.
Случајот предизвика силни реакции во јавноста не само поради бројот на делата што му се ставаат на товар на обвинетиот, туку и поради прашањата што се отворија за претходното постапување на институциите, медицинските служби и системот за откривање насилна смрт.
Психијатриските вештачења извршени во истрагата, според информациите што претходно ги соопшти Обвинителството, биле дел од доказниот материјал во предметот. Сепак, конечната оценка за вината и за сите околности во случајот треба да ја донесе судот во текот на постапката.
Денешниот почеток на судењето покажа дека предметот ќе се води под силно внимание на јавноста, но и под голем притисок на семејствата на жртвите, кои првпат во судница се соочуваат со човекот што обвинителството го товари за најтешките кривични дела против нивните блиски.
