Skip to content
Основниот кривичен суд Скопје донесе ослободителна пресуда за поранешниот премиер и лидер на ВМРО-ДПМНЕ, Никола Груевски, во повтореното судење за предметот „Талир 2“, кој се однесува на изградбата на партиското седиште познато како „Белата палата“.
Пресудата ја изрече судијката Даниела Алексовска-Стојановска, која оцени дека обвинителството не успеало да докаже дека Груевски го сторил кривичното дело злоупотреба на службената положба и овластувањето. Според образложението пренесено од судницата, измените на Кривичниот законик значително го промениле битието на делото, а обвинението и доказите во повторената постапка не биле приспособени на новата правна состојба.
Ослободителната пресуда е првостепена и сè уште не значи дека ВМРО-ДПМНЕ автоматски добива целосно право да располага со седиштето и останатиот замрзнат имот. Обвинителството може да поднесе жалба, по што конечната одлука повторно ќе зависи од Апелациониот суд во Скопје.
Судијката посочила дека обвинителите останале на истите факти и докази врз кои во 2022 година биле осудени Груевски и тогашниот генерален секретар на партијата Кирил Божиновски, иако во меѓувреме беа изменети одредбите од Кривичниот законик што се однесуваат на злоупотребата на службената положба. Судот во повторената постапка оценил дека со таквата доказна поставеност обвинението не е докажано.
Во првата постапка, Груевски беше осуден на шест години затвор, а Божиновски доби условна казна. Судот тогаш наложи и конфискација на централното седиште на ВМРО-ДПМНЕ, како и на друг партиски имот за кој обвинителството тврдеше дека бил стекнат со средствата произлезени од спорниот договор со градежната компанија „Бетон“.
Апелациониот суд во јануари 2024 година ја укина таа пресуда и го врати предметот на повторно судење. Во одлуката беше наведено дека судот мора да ги земе предвид измените на членот 353 од Кривичниот законик, со кои беа намалени казните и роковите за застарување кај дел од кривичните дела поврзани со злоупотреба на службената положба.
Во меѓувреме, кривичното гонење против Кирил Божиновски запре поради застарување, па во повторената постапка како обвинет остана Груевски, кому му се судеше во отсуство, додека ВМРО-ДПМНЕ учествуваше како правно лице засегнато од мерките врз имотот. Груевски од 2018 година живее во Будимпешта, каде што доби азил.
Обвинението тврдеше дека Груевски и Божиновски, користејќи ја положбата во партијата и влијанието на ВМРО-ДПМНЕ како владејачка партија, овозможиле склучување договор со „Бетон“ преку кој партијата добила ново седиште и имотна корист од над 132 милиони денари. „Бетон“ требало да изгради хотел на партиска парцела во центарот на Скопје, а за возврат бесплатно го изградил осумкатното седиште на ВМРО-ДПМНЕ.
Првичната судска одлука опфаќаше конфискација на „Белата палата“ и повеќе други недвижности на партијата. Имотот, сепак, никогаш не бил префрлен во сопственост на државата, бидејќи пресудата не станала правосилна и била укината од Апелација. Врз недвижностите останаа привремени мерки со кои ВМРО-ДПМНЕ не можеше да ги продава или отуѓува.
Во октомври 2025 година судот дозволи замрзнатиот имот да се издава под закуп, но партијата не доби право да располага со парите од киријата. Средствата требаше да се уплаќаат на посебна сметка до завршувањето на кривичната постапка. Тогаш беше наведено дека мерките опфаќаат 68 недвижности и имот чија проценета вредност изнесува околу 17 милиони евра.
Доколку ослободителната пресуда стане правосилна, ќе исчезне кривично-правната основа врз која обвинителството бараше конфискација во „Талир 2“, што на ВМРО-ДПМНЕ би му овозможило да побара укинување на преостанатите мерки за обезбедување на имотот. До правосилна одлука, „Белата палата“ и другите недвижности остануваат предмет на судската постапка и на одделните решенија со кои е ограничено располагањето.
