Последен пекол ден, од утре драматичен пресврт, прогноза по градови

Македонија денес го минува последниот ден од најжешката фаза на топлотниот бран, со температури до 39 степени, а локално и до 40 степени. Жолтото предупредување за екстремно високи температури останува активно во повеќе региони, додека попладне се можни изолирани грмежи.

Промената на времето ќе почне утре попладне, со локален развој на нестабилна облачност, пороен дожд, грмежи и засилен ветер. Сепак, во јужните, централните и источните делови во вторник сè уште ќе биде екстремно топло, а во Кавадарци температурата може да достигне 40 степени.

Вистинскиот температурен пресврт ќе се почувствува во среда, кога максималните температури во поголем дел од земјата ќе се намалат за 7 до 12 степени. Во Скопје се очекуваат околу 28 степени, во Куманово 25, во Тетово и Гостивар 28, додека најтопло ќе остане во Гевгелија и Струмица со околу 32 степени.

Денес најтопло ќе биде во Кавадарци со 39 степени, а по 38 степени се очекуваат во Гевгелија и Струмица. Скопје, Штип и Кочани ќе достигнат до 36 степени. Во попладневните часови локална нестабилност е можна во Скопската, Полошката, Пелагониската и североисточната котлина.

Во вторник жештината нема веднаш да попушти. Кавадарци може да достигне 40 степени, Кочани 38, а Скопје, Прилеп, Штип и Велес околу 36 степени. Од попладне ќе има услови за локални поројни врнежи и грмежи, првенствено во северните, западните и централните делови.

Во среда ќе навлезе посвеж воздух. Најголем пад се очекува во Куманово, каде максималната температура од 35 ќе се спушти на околу 25 степени, како и во Скопје, Штип и Велес, каде ќе биде околу 28 степени. Утрата ќе станат значително посвежи, со минимални температури од 11 до 17 степени.

Поради локалниот карактер на нестабилноста, врнежите нема да бидат рамномерно распределени. Можно е во еден дел од градот да има краткотраен пороен дожд и грмежи, додека во соседните населби да остане суво.