ЦУК примил над 12.000 повици по невремето во Скопје

Центарот за управување со кризи примил повеќе од 12.000 повици за помош по силното невреме што во вторникот го зафати Скопје и предизвика голема материјална штета низ градот.

Директорот на ЦУК, Мухамед Али, изјави дека повиците пристигнале од територијата на Скопје и дека секоја пријава била примена и проследена до надлежната институција. Телефоните во Центарот продолжиле да ѕвонат и следниот ден, додека екипите работеле на расчистување на последиците.

Според претходното соопштение на ЦУК, само преку единствениот број за итни случаи 112, по 17 часот биле примени повеќе од 9.000 повици. Најголем дел од пријавите се однесувале на паднати дрвја, оштетени возила и покриви, скинати електрични кабли, паднати бандери и блокирани улици.

Али информира дека итните служби, комуналните претпријатија и екипите на „Паркови и зеленило“ биле постојано на терен. Интервенции имало во Чаир и во останатите скопски општини, а расчистувањето продолжило и во текот на следниот ден.

Според билансот на Министерството за внатрешни работи, до 22 часот во Скопје биле евидентирани 117 оштетени возила, 35 оштетени покриви, 189 паднати дрвја, седум оштетени семафори и пет пожари. Во невремето биле повредени десет лица.

Директорот на ЦУК посочи дека во периодот на зголемена опасност од пожари се користи и новиот систем за рана детекција, поставен на повеќе од 40 локации. Системот преку интелигентни камери може за околу 20 секунди да ја утврди локацијата на пожарот и да испрати известување до оперативниот центар.