Skip to content
Пари од М-НАВ и од други државни компании ќе бидат искористени за отплата на кредит кон кинеска банка за изградбата на автопатите, потврди премиерот Христијан Мицкоски. СДСМ реагираше со прашањето каде исчезнале буџетските милиони и оцени дека Владата посегнува по средствата на јавните претпријатија поради недостиг на ликвидност.
Мицкоски изјави дека во финансиската конструкција не се вклучени само седумте милиони евра позајмени од М-НАВ, туку и средства од МЕПСО, Државна лотарија и од Јавното претпријатие за државни патишта. Според неговата најава, позајмените пари ќе им бидат вратени на компаниите во август.
Владата ја донела одлуката за заемот од М-НАВ на 14 јули, а раководството на компанијата неколку дена подоцна ја одобрило краткорочната позајмица. Станува збор за седум милиони евра без камата, со рок за враќање до 30 ноември 2026 година.
Премиерот тврди дека ваквото префрлање средства меѓу државните компании е вообичаена практика која се применувала и во минатото. Но, објаснувањето дека парите ќе бидат вратени во август не одговара на прашањето зошто ЈП за државни патишта немало доволно сопствени средства за навремено да ја плати обврската кон кинеската банка.
Не е објавено ниту колку пари се обезбедени од МЕПСО и од Државна лотарија, какви се условите под кои се позајмени и од кој извор ќе бидат вратени. Недостигот од целосни податоци ја отвора дилемата дали станува збор само за краткорочно управување со ликвидноста или за поширок проблем со финансирањето на државните обврски.
Посебно прашање е користењето пари од М-НАВ, компанија задолжена за контролата и безбедноста на воздушната навигација. Дел од средствата на компанијата се поврзани со нејзиното работење, инвестициите и модернизацијата на системот, поради што јавноста треба да знае дали трансакцијата може да влијае врз планираните проекти.
Од СДСМ оценија дека Владата почнала да позајмува пари од сопствените претпријатија затоа што државната каса е празна. Партијата побара одговор каде се буџетските средства и зошто отплатата на кредитот се покрива со пари од компании кои имаат други законски и оперативни обврски.
