Невиден топлотен бран ја зафаќа Македонија, прогноза по градови

Македонија влегува во продолжениот празничен викенд под влијание на топла воздушна маса од југ, која ќе донесе сончево, претежно ведро и исклучително топло време во сите делови од земјата. Температурите во сабота и недела насекаде ќе надминат 30 степени, а во најтоплите градови ќе се искачат до 39 степени. НАПОМЕНА: Максималните температури се оние под сенка, директно на сонце се качуваат за уште 5 до 10 степени!

Според Управата за хидрометеоролошки работи, топлотниот бран нема да заврши со викендот. Сончевото и многу топло време ќе се задржи и во текот на следната седмица, а од среда на одредени места се очекуваат температури над 40 степени. Високи температури ќе има и во ноќните часови, што ќе го отежне разладувањето на воздухот и на домовите.

Најтопло за време на викендот ќе биде во Кавадарци, каде и во сабота и во недела се очекуваат 39 степени. Во Штип температурата ќе достигне 38 степени, додека во Скопје, Велес, Кочани, Гевгелија и Струмица ќе се измерaт околу 37 степени.

За сабота, 1 август, од 10 до 18 часот е издадено портокалово предупредување за екстремно високи температури во сите региони. Жолтото предупредување ќе остане во сила до недела, 2 август, напладне. Подолг престој на сонце и потешка физичка активност во најтоплиот период од денот носат ризик од дехидратација и топлотен удар.

Во табелата е прикажана минималната и максималната температура за сабота и недела (во сенка). Податоците се означени во формат максимална/минимална температура.

Во сабота времето ќе биде сончево и жешко во целата земја, без услови за позначителни врнежи. Најпријатни температури се очекуваат во Дебар, Охрид, Ресен и Струга, но и таму сончевото зрачење ќе биде силно во средината на денот.

Во недела ќе продолжи речиси идентична временска слика. Во дел од западните градови температурата ќе се намали за еден до два степена, додека во централните, источните и југоисточните делови повторно ќе се движи од 35 до 39 степени.

Граѓаните треба да го ограничат престојот на отворено во периодот од 11 до 17 часот, редовно да внесуваат вода и да носат лесна и светла облека. Посебно внимание е потребно за малите деца, повозрасните лица, хронично болните и работниците што работат на отворено.

Топлотниот бран ќе продолжи и по викендот, а неговиот врв се очекува во средината на следната седмица, кога дневната температура во делови од Македонија ќе надмине 40 степени.