Skip to content
Хакер кој на интернет се претставува под името Cyberleek се заканува дека ќе ја објави целосната верзија на долгоочекуваната видеоигра Grand Theft Auto VI (GTA 6), повеќе од еден месец пред нејзиното официјално излегување, закажано за 19 ноември 2026 година. Зад името Cyberleek засега не е утврдено дали стои поединец или група хакери.
Според специјализираните медиуми PC Gamer и Video Games Chronicle, Cyberleek тврди дека поседува функционална верзија на играта, со целосната приказна, сите мисии и завршните сцени. За нејзиното објавување поставил необичен услов, криптовалутата што ја промовира да достигне пазарна капитализација од 30 милиони долари.
Во пораката објавена на 10 октомври, Cyberleek наведува дека доколку не биде достигната оваа вредност, ќе ја објави верзијата на GTA 6 што може да се игра од почеток до крај. Истовремено, на компанијата Take-Two Interactive, сопственик на Rockstar Games, ѝ нуди можност да го спречи објавувањето доколку обезбеди физичко издание на играта на дискови и јавно се извини.
Cyberleek веќе неколку месеци објавува неовластени снимки од GTA 6. Последниот материјал, објавен на 8 октомври, трае околу 25 минути и прикажува делови од играта, нови сцени со главните ликови Џејсон и Лусија, возење и делови од приказната што претходно не биле јавно претставени.
Медиумот Video Games Chronicle наведува дека ги прегледал снимките и дека тие изгледаат автентично. Сепак, тоа не претставува доказ дека Cyberleek навистина ја поседува целосната верзија на играта.
Особено внимание привлекува поврзаноста на заканите со криптовалутата CYBERLEEK. Според објавените информации, хакерот и претходно ги користел снимките од играта за нејзина промоција, а во август наводно остварил околу 250.000 долари приходи од активности поврзани со криптовалутата. Новиот ултиматум отвора сомнежи дека заканата за објавување на играта може да биде и обид за зголемување на нејзината пазарна вредност.
Rockstar Games и Take-Two Interactive веќе преземаат правни чекори за идентификување на лицата одговорни за претходните протекувања на материјали од играта.
GTA 6 е едно од најочекуваните изданија во индустријата за видеоигри, а нејзиното официјално лансирање е закажано за 19 ноември, за конзолите PlayStation 5 и Xbox Series X/S.
Засега нема независна потврда дека Cyberleek располага со целата игра, ниту дека ќе може да ја објави пред официјалната премиера.
