Skip to content
Американската банка „Капитал уан“ соопшти дека затворила над 300 банкарски сметки поврзани со „Организацијата Трамп“ по повеќемесечна проверка на нејзиниот тим за спречување перење пари.
Сметките не биле блокирани сега, како што сугерира дел од медиумските известувања. Банката ја известила компанијата за нивното затворање уште во март 2021 година, а причините сега ги образложува во судска постапка поведена од семејниот бизнис на американскиот претседател Доналд Трамп.
Во поднесокот до федералниот суд во Флорида, „Капитал уан“ наведува дека одлуката била донесена по детална анализа на трансакциите и проверка според банкарските правила и федералните насоки за спречување перење пари.
Банката тврди дека забележаните трансакциски обрасци спаѓале во категориите активности на кои финансиските институции треба да посветат дополнително внимание. Таа, сепак, не ја обвинува „Организацијата Трамп“ дека извршила кривично дело или дека незаконски перела пари.
„Организацијата Трамп“ и Ерик Трамп ја тужија банката во март 2025 година, тврдејќи дека сметките биле затворени поради политичка дискриминација и желбата на банката да се дистанцира од Доналд Трамп по упадот во американскиот Конгрес на 6 јануари 2021 година.
„Капитал уан“ ги отфрла овие наводи и бара тужбата да биде отфрлена. Според банката, тврдењата за политички мотив се засноваат на издвоени делови од документацијата без целосниот контекст.
Судот во Мајами досега отфрлил две верзии на тужбата, но им дозволил на тужителите да поднесат изменети барања. Последната верзија била поднесена во јули, а банката смета дека и таа ги содржи истите правни недостатоци.
Спорот е дел од пошироката конфронтација меѓу администрацијата на Трамп и големите американски банки. Трамп и неговите соработници тврдат дека конзервативни граѓани и компании биле исклучувани од банкарски услуги поради нивните политички ставови, додека банките најчесто се повикуваат на регулаторни и деловни ризици.
