Skip to content
Зголемената фреквенција на возила утрово создаде колони на три гранични премини, каде што патниците чекаат околу еден час, соопшти Автомото-сојузот на Македонија.
На Табановце задржувањето од околу еден час е за влез во Македонија, додека на Богородица и Дојран толку се чека за излез од земјата кон Грција. На останатите гранични премини, од македонска страна, засега нема подолги задржувања.
Сообраќајот на државните патишта се одвива непречено и по суви коловози, а интензитетот надвор од градските средини е умерен. Состојбата на границите може брзо да се менува поради летната туристичка сезона и зголемениот број возила.
АМСМ препорачува приспособена брзина и внимателно возење, особено низ клисурите, речните долини и котлините, каде што постои можност за одрони. Посебно внимание е потребно на делниците Катланово – Велес, Маврово – Дебар – Струга, Виница – Берово и Кочани – Делчево.
На патниот правец Кичево – Охрид сообраќајот се одвива со девијации поради градежни работи на повеќе делници, па на возачите им се препорачува да ја почитуваат поставената сигнализација и да предвидат дополнително време за патување.
