Skip to content
Американскиот претседател Доналд Трамп ги одложи новите воени напади врз Иран и најави дека во понеделник, 3 август, ќе започне нова рунда преговори за прекин на војната, иранската нуклеарна програма и повторното отворање на Ормутскиот теснец.
Трамп изјави дека не поставува краен рок за постигнување договор и дека сака да види дали дипломатските разговори ќе дадат резултат. Американските сили, сепак, остануваат подготвени за нова воена операција доколку преговорите повторно пропаднат.
Одлуката за одложување на нападите била донесена по разговорите со лидерите на Саудиска Арабија, Катар и Обединетите Арапски Емирати, кои предупредиле дека нова американска офанзива може да предизвика ирански напади врз енергетската и воената инфраструктура низ Персискиот Залив.
Трамп тврди дека Иран и земјите од регионот побарале дополнително време за постигнување договор. Од Техеран, меѓутоа, ги отфрлија тврдењата дека побарале од американскиот претседател да ги запре нападите и порачаа дека иранските вооружени сили остануваат во состојба на висока готовност.
Главното прашање во разговорите ќе биде повторното воспоставување на безбедна пловидба низ Ормутскиот теснец, преку кој во нормални услови поминува значителен дел од светската трговија со нафта и течен природен гас. Во преговорите се вклучени Оман, Пакистан, Катар и други регионални посредници.
Иранскиот министер за надворешни работи Абас Арагчи во Мускат разговарал со султанот на Оман за безбедноста на пловидбата, идното управување со теснецот и пошироките преговори за завршување на војната. Оман изразил подготвеност да продолжи со посредувањето меѓу завојуваните страни.
Од американска страна се бараат гаранции дека Иран нема да развие нуклеарно оружје, запирање на нападите врз американските и сојузничките цели и непречено движење на трговските бродови. Техеран, пак, бара укинување на санкциите и признавање на неговото право на цивилна нуклеарна програма.
И покрај најавените преговори, сè уште нема потпишан договор, ниту официјално прогласен траен прекин на огнот. Иранските и американските претставници во изминатите месеци повеќепати постигнуваа привремени разбирања, по кои нападите повторно продолжуваа.
Најавата за дипломатски разговори веднаш се одрази врз пазарите. Цените на американската нафта и на „брент“ паднаа за околу пет отсто, откако инвеститорите проценија дека е намалена непосредната опасност од нови напади и подолготрајно затворање на Ормутскиот теснец.
Американските амбасади во повеќе земји од Блискиот Исток и понатаму ги советуваат државјаните на САД да бидат подготвени за брзо заминување поради можноста преговорите да пропаднат и конфликтот повторно да ескалира.
