Skip to content
Луѓето кои често користат канабис имаат повисоко ниво на кортизол веднаш по будењето во споредба со лицата што не го користат, покажува ново истражување на научници од Државниот универзитет во Орегон.
Истражувањето опфатило 39 редовни корисници на канабис и 43 лица од контролната група. Учесниците собирале примероци од плунка веднаш по будењето, 30 минути подоцна и навечер, во текот на два последователни работни дена. Истовремено одговарале на прашања за стресот, сонот и менталното здравје.
Научниците не утврдиле значајна разлика во природното утринско зголемување на кортизолот меѓу двете групи. Разликата била во почетната вредност: редовните корисници уште при будењето имале повисоко ниво на хормонот, а поголемите вредности биле поврзани и со посериозни последици од употребата на канабис.
Кортизолот го регулира одговорот на организмот на стрес, крвниот притисок, шеќерот во крвта и метаболизмот. Краткотрајното зголемување е нормален и корисен механизам, но долготрајно нарушените нивоа можат да бидат поврзани со здравствени проблеми.
Наодите не докажуваат дека канабисот директно го зголемува кортизолот. Можно е луѓето кои се изложени на поголем стрес почесто да користат канабис, но можна е и обратна врска, редовната употреба со текот на времето да го нарушува природниот систем за одговор на стрес.
Авторката на истражувањето Анита Червенка посочува дека утринското ниво на кортизол во иднина би можело да служи како биолошки показател за проблематична употреба на канабис, но за таков заклучок се потребни подолгорочни студии со поголем број испитаници.
Истражувањето не покажува ниту дека канабисот кај секој корисник го зголемува чувството на стрес. Претходните студии даваат различни резултати, зависно од зачестеноста на употребата, дозата, времето на мерење и карактеристиките на испитаниците.
