Skip to content
Речиси сите регистрирани случаи на западнонилска треска во Македонија се од Скопскиот регион и Велес, изјави министерот за здравство Сашо Клековски.
Тој информираше дека здравствените власти презеле епидемиолошки мерки и извршиле вонредна дезинсекција во радиус од 200 метри околу домовите на регистрираните пациенти.
Во Драчево, каде што се потврдени пет случаи, било извршено прскање од земја, за кое Клековски рече дека е поефективно од авионската дезинсекција.
„Минатата година речиси сите случаи беа во Јужна Македонија, а сега речиси сите се во Скопскиот регион, заедно со Велес. Епидемиолошките власти постапија соодветно“, рече Клековски во интервју за телевизија „Канал 5“.
Според него, биле извршени контроли во Скопје и во другите општини за да се утврди дали бил почитуван распоредот за редовно прскање против комарци. Најголемиот дел од општините се придржувале до планираниот редослед.
Клековски ги повика граѓаните да применуваат лична заштита од комарци и да не оставаат застојана вода во дворовите, бавчите и садовите околу домовите.
Тој посочи дека западнонилската треска со години се регистрира во Македонија, а најголем број случаи биле евидентирани во 2019 година.
Според последната официјална информација на Институтот за јавно здравје, заклучно со 27 јули во земјава биле регистрирани осум случаи, од кои седум потврдени и еден веројатен. Шест случаи биле автохтони и регистрирани во Скопје и Велес, а сите пациенти развиле невроинвазивна форма и биле хоспитализирани.
Клековски нагласи дека болеста не се пренесува преку вообичаен контакт меѓу луѓето. Природни домаќини на вирусот се дивите птици, а инфекцијата кај луѓето најчесто се пренесува преку убод од заразен комарец.
Министерот информираше и дека годинава во Македонија се регистрирани четири случаи на маларија, три на денга и еден случај на зика. Тој ги повика граѓаните што патуваат во тропски подрачја веднаш да побараат лекарска помош доколку по враќањето добијат температура или треска.
