Skip to content
Европската комисија со години дискретно ги следи таканаречените неидентификувани аномални појави, UAP, порано познати како НЛО, а документи до кои дошол „Еуроњуз“ покажуваат дека Брисел сака дополнително да ги подобри своите способности за нивно откривање и идентификација.
Според документ од одбранбениот сектор на Европската комисија, ЕУ најмалку од 2023 година покажува интерес за ваквите појави. Во одговор поврзан со необјаснети набљудувања над Малезија, Комисијата навела дека со развојот на технологијата станува подобра во забележувањето и идентификувањето на UAP, но дека капацитетите мора дополнително да се подобрат.
Приказната започнала кога татко и син од Малезија, аматерски астрономи чии набљудувања претходно биле признаени од вселенски агенции, во 2022 година испратиле писмо до Европската комисија. Тие доставиле 37 фотографии и снимки од небото и вселената, меѓу кои и објекти за кои тврделе дека не можат да ги идентификуваат.
Во писмото навеле дека некои од објектите се појавувале во близина на авиони, воени објекти и нуклеарни постројки, а побарале од претседателката на Европската комисија Урсула фон дер Лајен објаснување за нивното потекло.
Брисел одговорил дека нема надлежност да истражува појави над Малезија, но истовремено најавил дека ќе предложи земјите членки да ги зголемат капацитетите за откривање објекти во вселената околу Земјата. Таквите системи треба да помогнат и при идентификување на необјаснети објекти и при следење на вселенски отпад кој може да претставува опасност.
Од Комисијата сепак биле внимателни и нагласиле дека подобрата технологија нема автоматски да даде одговор за секој необјаснет случај.
Темата одамна не се разгледува само низ призмата на приказните за вонземјани. Во САД терминот НЛО во официјалната употреба во голема мера е заменет со UAP, токму за да се тргне стигмата и да се овозможи посериозно разгледување на феномените кои немаат веднаш достапно објаснување. Пентагон во 2020 година формираше специјална работна група за вакви случаи.
Во Европа, Франција е единствената земја од ЕУ со посебен државно финансиран центар за истражување на неидентификувани воздушни и вселенски појави, GEIPAN. Од неговото формирање во 1977 година центарот анализирал повеќе од 3.300 случаи. По детална анализа, 106 останале класифицирани како необјаснети, додека за уште 1.014 немало доволно информации за конечен заклучок.
Интересот се зголемува и поради безбедноста на воздушниот сообраќај. Германскиот европратеник Фабио Де Маси во 2025 и 2026 година повеќепати побарал од Европската комисија да воведе посебна и стандардизирана категорија преку која пилотите би пријавувале вакви средби. Целта е податоците од различните земји да можат да се споредуваат и подобро да се проценуваат можните ризици.
Пилоти со кои разговарал „Еуроњуз“ опишуваат случаи на светла и објекти кои се движеле на начин што не можеле да го објаснат. Еден холандски пилот тврди дека во 2023 година целиот екипаж на лет од Блискиот Исток кон Холандија повеќе од два часа набљудувал необични светла на голема височина јужно од Кипар. Друг пилот опишал необјаснети набљудувања над Грција и Шпанија.
Ниту еден од овие случаи сам по себе не претставува доказ за вонземско потекло. UAP едноставно означува појава или објект кој со расположливите податоци не можел веднаш да биде идентификуван.
Но документите покажуваат дека Брисел повеќе не ја отфрла темата како маргинална. Наместо тоа, интересот постепено се префрла кон многу попрактично прашање, што точно се движи низ европското небо и дали постојните радари и системи можат навреме да го препознаат.
