Skip to content
Обичната количка за пазарење постепено се претвора во дигитален асистент. Супермаркетите во Европа и САД се почесто тестираат паметни колички со вештачка интелигенција, камери, сензори и екрани, кои можат автоматски да препознаат што става купувачот внатре, да ја пресметуваат сметката и да го забрзаат плаќањето.
Новите системи користат компјутерски вид и различни сензори за да ги препознаат производите уште при нивното ставање во количката. Кај овошјето и зеленчукот, дел од моделите можат автоматски да ја утврдат и тежината, додека на екранот постојано се прикажува вкупната вредност на купувањето.
Технологијата веќе влегува во големите европски трговски синџири. Белгискиот Colruyt годинава го прошири користењето на сопствените Smart Cart колички во повеќе продавници, а британскиот Morrisons во јули почна да ги тестира AI количките Caper на Instacart.
Освен автоматското скенирање, системите можат да поврзат листа за пазарење, програми за лојалност и попусти, да предложат производи и да му покажат на купувачот колку пари потрошил во секој момент. Некои модели овозможуваат и плаќање директно преку количката, без класично чекање на каса.
Трендот пристигнува и на Балканот. БГНЕС пишува дека на бугарскиот пазар веќе се појавуваат колички со мобилни терминали за скенирање баркодови и дигитално плаќање, како дел од пошироката дигитализација на супермаркетите.
Истовремено, традиционалната каса засега не исчезнува. Трговците ги воведуваат новите системи постепено, паралелно со класичните каси и самонаплатните терминали. Colruyt, на пример, најавува дека традиционалните каси ќе продолжат да се користат и покрај воведувањето на паметните колички.
