Skip to content
Странски возачи плаќаат казни од „Сејф сити“ на граничниот премин Табановце, каде денеска се создадоа редици од лица кои при излез од Македонија биле известени дека камерите претходно им регистрирале сообраќаен прекршок. Со тоа практично почна примената на механизмот што МВР го најавуваше во изминатите недели, казните од „Безбеден град“ повеќе да не завршуваат само кај возачите со македонски таблички.
Сликата од Табановце е првиот повидлив знак дека се затвора дупката во системот која со месеци им овозможуваше на странските возачи да бидат снимени од камерите, а сепак да ја напуштат државата без да ја платат санкцијата.
На граничниот премин денеска има редици од странски возачи кои чекаат да ги подмират казните за прекршоци регистрирани од системот, објави Канал 5.
Според постапката што МВР ја најави на 10 август, кога возач со странски регистарски таблички ќе пристигне на Табановце, а во системот има евидентиран прекршок, треба да биде известен за него. Потоа му се издава записник и прекршочен платен налог, по што може да ја плати казната или да биде изведен пред надлежен суд во брза постапка.
Ова е значајна промена во однос на состојбата од почетокот на летото.
Податоците што МВР ги достави во јули покажаа дека само од 2 февруари до 31 мај системот „Безбеден град“ регистрирал 33.722 прекршоци направени со возила со странски регистарски таблички. Во тој период за нив сè уште немаше воспоставен механизам за директна наплата, па странските возачи практично можеа да ја напуштат Македонија без санкцијата да биде реализирана.
Тоа значеше дека повеќе од една четвртина од прекршоците што ги снимал системот во тој период биле направени со странски возила, а не можеле да бидат наплатени на истиот начин како кај домашните возачи.
Министерот за внатрешни работи Панче Тошковски уште на 1 јули, токму на Табановце, најави дека системот ќе важи за сите без разлика на регистарските таблички и дека МВР работи на механизам преку кој казните ќе стигнат и до оние што само транзитираат низ Македонија.
Додека системот не беше подготвен, странските возачи кои правеа прекршоци на коридорите 8 и 10 можеа да бидат санкционирани од полициските пресретнувачи, но камерите само ги евидентираа прекршоците без можност за непосредна наплата.
Сега Табановце станува првиот граничен премин каде оваа разлика почнува практично да исчезнува.
МВР претходно најави дека истиот модел постепено ќе биде воведен и на останатите гранични премини, што значи дека странски возач снимен при пребрзо возење или друг прекршок нема да може едноставно да ја напушти земјата без постапка за санкцијата.
