Неколку земји со мнозинско муслиманско население го осудија палењето на примерок од Куранот во Шведска на протест.
Салван Момика, за кој се вели дека е Ирачанец кој живее во Шведска, вчера пред централната џамија во Стокхолм запали копија од Куранот .
Земјите од Блискиот Исток, вклучувајќи ги Ирак, Иран, Саудиска Арабија и Египет, силно го критикуваа палењето.
Турција, членка на НАТО со право на глас за тоа дали Шведска ќе добие членство, тоа го нарече „одвратен чин“ нагласувајќи дека е „неприфатливо“ да се дозволи такви „антиисламски акции“ да се случуваат „под изговор на слободата на изразување“.
Муслиманите го сметаат Куранот за свето Божјо слово и сметаат дека секое намерно оштетување или покажување непочитување кон него е длабоко навредливо.
Палењето на Куранот вчера се случи додека муслиманите ширум светот го славеа првиот ден од Курбан Бајрам, еден од најважните фестивали во муслиманскиот календар.
Шведската полиција му даде дозвола на Момика за протестот, во согласност со законите за слобода на говорот. Но, подоцна полицијата соопшти дека инцидентот се истражува како дело за поттикнување омраза.
Протестот предизвика гнев и кај другите нации. Мароко го отповика својот амбасадор во Стокхолм и го протера шведскиот в.д. амбасадор во Рабат.
Ирак рече дека инцидентот е „одраз на агресивна омраза кој нема никаква врска со слободата на изразување“.
Иран ги повтори критиките на Ирак, нарекувајќи го чинот на палење на Куранот „провокативен“ и „неприфатлив“, додека Египет го опиша како „срамен“ чин кој беше особено провокативен додека муслиманите го одбележуваат Курбан Бајрам.
Саудиска Арабија – дестинација на околу 1,8 милиони верници на годишниот аџилак оваа недела – рече дека „овие омраза и повторени дела не можат да бидат прифатени со никакво оправдување“.
Шведскиот премиер Улф Кристерсон рече дека палењето на Куранот е „легално, но не е соодветно“.
Плановите за палење копии од Куранот предизвикаа протести и немири во Шведска во последните месеци.
Полицијата неодамна одби слични барања за протести, но судовите тогаш одлучија дека тие треба да бидат дозволени врз основа на слободата на изразување.
извор: Би-Би-Си(Нова)
