Skip to content
Џон Траволта повторно целосно го менува изгледот за нова улога. Во првиот трејлер за „November 1963“ актерот се појавува со зализана коса, мустаќи и изглед на чикашки мафијаш, во филм што повторно ја отвора една од најпознатите теории за атентатот врз Џон Ф. Кенеди.
Траволта го игра Џони Росели, влијателен член на криминалната организација „Chicago Outfit“, кој дејствувал во Лас Вегас и на западниот брег на САД. Филмот ги следи 48-те часа околу атентатот на Кенеди во Далас на 22 ноември 1963 година, но настаните ги раскажува од перспектива на луѓе поврзани со чикашкото подземје.
Режијата е на Роланд Жофе, авторот на „The Killing Fields“ и „The Mission“, а сценариото го потпишува Николас Челози, внук на мафијашкиот бос Сем Џанкана. Челози вели дека приказната ја градел врз сведоштва што како дете ги слушал од Џозеф „Пепе“ Џанкана, братот на Сем Џанкана.
Филмот ја драматизира тезата дека семејството Кенеди добило помош од чикашката мафија за претседателските избори во 1960 година, а дека подоцнежната офанзива на Роберт Кенеди против организираниот криминал била доживеана како предавство. Од таа точка „November 1963“ ја развива приказната за можна мафијашка вмешаност во атентатот.
Но таа верзија не е утврден историски факт.
Вореновата комисија во 1964 година заклучи дека Ли Харви Освалд го убил Кенеди и дека дејствувал сам. Подоцнежната истрага на Претставничкиот дом во 1979 година оцени дека Кенеди веројатно бил убиен како резултат на заговор, но не утврди дека организираниот криминал како организација стоел зад атентатот. Комитетот остави отворена можност поединечни членови на подземјето да биле вмешани.
Токму просторот меѓу официјалната историја и децениските сомнежи е основата на новиот филм.
Покрај Траволта, Менди Патинкин го игра мафијашкиот бос Ентони Акардо, Дермот Малрони е Чаки Николети, а Роберт Карлајл се појавува како Џек Руби – сопственикот на ноќен клуб кој два дена по атентатот го застрела Освалд. Џеферсон Вајт е во улогата на Ли Харви Освалд.
Продукцијата за потребите на снимањето повторно го изградила Дили Плаза, местото на атентатот, а во сцените биле користени околу 1.500 статисти и повеќе од 75 возила од периодот.
Сепак, првото нешто што го привлече вниманието по објавувањето на трејлерот е Траволта.
По години во кои публиката го препознава со избричена глава, 72-годишниот актер во „November 1963“ речиси исчезнува зад ликот на Росели – со темна зализана коса, тенки мустаќи и стил од американското подземје од почетокот на шеесеттите.
„November 1963“ треба да пристигне во американските киносали на 20 ноември, два дена пред 63-годишнината од атентатот на Кенеди.
