Македонија ги почна подготовките за стартот во Б-дивизијата на Лигата на нации

Фудбалската репрезентација на Македонија ги почна подготовките за новиот циклус во Лигата на нации, во кој првпат ќе настапува во Б-дивизијата. Првиот натпревар е против Швајцарија на 26 септември во Скопје, по што следуваат дуелите со Словенија и Шкотска.

Селекторот Гоце Седлоски за претстојните четири натпревари повика 28 фудбалери, меѓу кои и четворица дебитанти – дефанзивците Анес Мелиќи и Ѓорѓе Џеков, фудбалерот за врска Матеј Гаштаров и напаѓачот на Струга, Христијан Малески. Во националниот тим, по пауза од четири години, се враќа и Марио Младеновски.

Дел од репрезентативците веќе пристигнаа на собирот, а меѓу првите беа новите имиња во националниот состав. Подготовките ќе бидат насочени најпрво кон дуелот со Швајцарија, кој ќе се игра на Националната арена „Тодор Проески“ од 20:45 часот.

Три дена подоцна, на 29 септември, Македонија ќе гостува во Љубљана, а на 3 октомври повторно ќе игра во Скопје, овојпат против Шкотска. Серијата од четири натпревари ќе заврши на 6 октомври со гостувањето против Швајцарија во Луцерн.

Седлоски претходно најави дека во овој циклус ќе ротира и дека можност за настап ќе добијат повеќе фудбалери. За Швајцарија оцени дека се издвојува според квалитетот во групата, додека за дуелите со Словенија и Шкотска смета дека Македонија може рамноправно да се натпреварува.