Skip to content
Директорката на албанската разузнавачка служба SHISH, Влора Хисени, е ставена во домашен притвор и суспендирана од функцијата, во рамки на операција на Специјалното обвинителство против корупција и организиран криминал – SPAK, поврзана со истрагата за Националната агенција за информатичко општество – AKSHI.
Специјалниот суд против корупција и организиран криминал ја одобрил мерката за Хисени на барање на SPAK.
Истовремено, истражителите извршиле претрес во домот на поранешниот генерален директор на албанската државна полиција Илир Прода. Според информациите објавени утрово од повеќе албански медиуми, претреси се вршат и на други локации поврзани со сегашни и поранешни функционери.
Операцијата е дел од пошироката истрага за случајот AKSHI, албанската Национална агенција за информатичко општество, која управува со голем дел од дигиталната инфраструктура и електронските услуги на државата.
Истрагата за AKSHI подолг период е во фокусот на SPAK поради сомневања поврзани со постапки за јавни набавки. Во рамки на предметот претходно беа преземени мерки и против други лица поврзани со агенцијата.
Хисени е на чело на SHISH од 2023 година. Пред назначувањето во Албанија, таа извршуваше високи функции во безбедносните институции на Косово, меѓу кои и заменик-директор на Косовската разузнавачка агенција.
Засега нема детално официјално соопштение од SPAK со целосен опис на сомневањата што конкретно се однесуваат на Хисени и Прода. Поради тоа, нивната точна улога во предметот и евентуалните кривични дела за кои се води истрагата не треба да се прејудицираат.
Мерката домашен притвор и суспензијата од функцијата не претставуваат утврдување вина, туку мерки во рамки на тековна истражна постапка.
