Од 2030 година нови даноци за цигарите во ЕУ

Европската унија подготвува нови правила за никотинските производи, со кои во фокусот повеќе нема да бидат само класичните цигари. На маса се електронските цигари, вејповите, загреаниот тутун и никотинските ќесички, но и нивните вкусови, пакување и рекламирање.

Европската комисија во 2026 година започна процес на ревизија на правилата за тутун и сродни производи, со цел регулативата да се приспособи на пазарот на кој во последните години се појавија нови производи што не постоеле кога биле донесени актуелните правила.

Особено внимание привлекуваат никотинските ќесички – производи без тутун кои содржат никотин и се користат во устата. Тие во моментов не се целосно опфатени со европската Директива за тутунски производи, поради што земјите членки имаат различни правила за нивната продажба, состав, рекламирање и оданочување.

Во рамките на ревизијата се разгледуваат и правила за вкусовите кај електронските цигари, еднократните вејпови, производите со загреан тутун и никотинските ќесички. На маса се и построги барања за пакувањето, означувањето и дигиталното рекламирање.

Додека Брисел работи на заеднички пристап, дел од европските земји веќе преземаат сопствени мерки. Полска доби одобрение од Европската комисија за национални мерки со кои се ограничува ставањето на пазарот на еднократни електронски цигари, а слични мерки преземаат и други земји. Холандија, пак, предложи ограничување на количината на никотин во одредени производи без тутун.

Паралелно со здравствената регулација, Европската комисија предложи и промени во акцизите за тутун и нови никотински производи. Според предлогот, никотинските ќесички би можеле да се оданочуваат со минимална акциза од 25 отсто од малопродажната цена или 71,50 евра за килограм од 2030 година. Од 2032 година предложената акциза би се зголемила на 50 отсто од малопродажната цена или 143 евра за килограм.

Предлогот предвидува и минимални акцизи за е-течностите, зависно од концентрацијата на никотин.

Важно е дека ова сè уште не е конечна регулатива, туку предлог кој треба да помине низ европската законодавна процедура.

Пошироката цел на ЕУ е до 2040 година употребата на тутун да падне под 5 отсто од населението. Според податоците на Заедничкиот истражувачки центар на ЕУ, околу 24 отсто од возрасните во Унијата пушат, што е намалување во однос на 28 отсто во 2012 година.

Сепак, паралелно со падот на класичните цигари, расте интересот за електронски цигари и други нови никотински производи, па Европа сега се обидува да воспостави правила и за новиот пазар на никотин.