Skip to content
СДСМ ја обвини Платформата ЗНАМ 2.0 дека со писмо испратено вчера се обидела да го пренасочи вниманието од темите поврзани со европските интеграции на Македонија, во период кога во земјава престојуваше претседателката на Европската комисија, Урсула фон дер Лајен.
Од опозициската партија велат дека документот бил доставен еден час по нивната прес-конференција посветена на европското обвинителство и непосредно пред прес-конференцијата на Фон дер Лајен.
„Уште еден дефокус. Да го тргнат вниманието од главниот проблем: застанувањето на Македонија кон ЕУ“, соопшти СДСМ.
Според партијата, тајмингот на писмото е поврзан со изјавите на Фон дер Лајен за европската перспектива на Македонија. СДСМ наведува дека претседателката на Европската комисија потврдила дека македонскиот јазик и идентитет се добредојдени во ЕУ, дека нема патокази за Македонија и дека земјата треба да ги исполни условите поврзани со европската интеграција.
Од СДСМ особено ја издвојуваат темата за европското јавно обвинителство и инсистираат на тоа дека Лаура Ковеши треба да биде вклучена во процесот пред членството на Македонија во ЕУ.
„Лаура Ковеши пред членство. Не после“, стои во соопштението.
СДСМ ги поврзува писмото и претходните активности на Платформата
Во реакцијата СДСМ се навраќа и на претходните активности на Платформата ЗНАМ 2.0, за кои тврди дека се појавувале во моменти кога опозицијата отворала теми поврзани со работењето на Владата.
Партијата ги наведува своите обвинувања за лобирањето во САД, антимонот, најавените рударски проекти, договорите поврзани со настапот на Дејвид Гета, тендерот вреден 1,6 милиони евра за фирма што, според СДСМ, е поврзана со Ќуркчиев, како и други случаи што ги квалификува како коруптивни скандали.
СДСМ во соопштението повторно го отвора и прашањето за настапот на Дејвид Гета, тврдејќи дека спротивно на изјавите за „нула денари“, аранжманите биле вредни 5,53 милиони евра.
Од партијата го поврзуваат и најновото појавување на Платформата со најавите за воведување нови „паметни“ броила, за кои велат дека треба да бидат предмет на јавна дебата.
СДСМ за односите меѓу ЗНАМ, ВМРО-ДПМНЕ и Левица
Во продолжение на реакцијата, СДСМ ја обвинува Платформата ЗНАМ 2.0 дека дејствува како политички сојузник на власта и ја поврзува со Левица.
„Истите што седат со руската Левица. Анти-НАТО. Анти-ЕУ. Против стратешкиот партнер Америка. Баш со нив прават сојуз“, наведува СДСМ.
Партијата како пример ја посочува и неодамнешната средба на претставници на Левица во Москва со претставници на Комунистичката партија на Русија.
СДСМ заклучува дека писмото на Платформата, според нивното толкување, не било насочено кон опозицијата, туку кон пренасочување на јавниот фокус од темите што ги отвора СДСМ.
„Писмото не е за СДСМ. Писмото е да не се зборува за признатиот македонски идентитет, заглавениот европски пат, Лаура Ковеши, за скандалите на власта, за рудници и за броила“, наведува опозициската партија.
Од СДСМ велат дека нема да учествуваат во, како што го нарекуваат, „дефокусот“ и дека ќе продолжат да ги отвораат темите што ги сметаат за важни за граѓаните и европската перспектива на државата.
Во соопштението партијата повторно го поврзува европското обвинителство со одговорноста на носителите на јавни функции, најавувајќи дека, како што велат, „доаѓа времето на вистина и правда“.
