Skip to content
Вселенскиот телескоп „Ненси Грејс Роман“ на НАСА успешно ги заврши првите тестови на системот за прецизно насочување и го активираше коронографот – инструмент кој треба да овозможи директно набљудување на егзопланети околу блиски ѕвезди.
Тестовите, спроведени во втората половина на септември, покажале дека телескопот може исклучително прецизно да ја задржи својата позиција за време на долги набљудувања. Според НАСА, стабилноста е подобра од 1/100.000 дел од степен во период од половина час, а при работа со коронографот може да се одржува и до осум часа.
Од агенцијата ја споредуваат оваа прецизност со насочување ласерски зрак кон паричка од оддалеченост од околу 240 километри. Тимот очекува со дополнителни прилагодувања прецизноста дополнително да се подобри.
Коронографот за првпат бил насочен кон вселената на 22 септември, а нов тест бил направен на 27 септември. Инструментот работи така што ја блокира силната светлина од ѕвездата, овозможувајќи да се регистрираат многу послаби објекти во нејзината близина – планети и дискови од прашина и гас.
Во првиот тест коронографот снимил бледа ѕвезда во Големиот Магеланов Облак. Неколку дена подоцна, по ладењето на детекторите, инструментот регистрирал поголем број ѕвезди, со што инженерите го потврдиле фокусот и исправното функционирање на системот.
„Роман“ користи делови од своите 18 детектори за постојано следење на референтни ѕвезди и за микрокорекции на позицијата на телескопот. Податоците се обработуваат приближно четири пати во секунда.
НАСА во следната фаза ќе тестира и нов систем за насочување според спектарот на светлината. Ако системот функционира според очекувањата, ќе овозможи уште поголема стабилност при набљудувањата.
Коронографот на „Роман“ е пред сè демонстрација на технологија која треба да покаже како идните телескопи би можеле директно да снимаат планети околу други ѕвезди и да ги анализираат нивните карактеристики.
Телескопот беше лансиран на 30 август годинава. Главната мисија ќе ги истражува темната енергија, темната материја, егзопланетите и развојот на Вселената, а научните набљудувања треба да започнат во 2027 година.
