Skip to content
За едни празникот е продолжен викенд, за други смена на каса, во болница, ресторан или зад волан. Работата на 11 Октомври отвора две одделни прашања за платата: што следува за празникот и што следува за работата во недела.
Годинава 11 Октомври се паѓа во недела, а според официјалната програма, и понеделник, 12 октомври, е неработен ден. Затоа пресметката треба да ги раздвои одработените часови, додатоците и надоместокот за празникот.
Што следува за празник, а што за недела?
ССМ го посочува членот 24 од Општиот колективен договор за приватниот сектор од областа на стопанството: за работа на празник работникот има право на надоместокот што би му припаѓал кога не работи и на плата за одработените часови зголемена за 50%. Договорот предвидува дека додатоците меѓусебно не се исклучуваат.
За работниците опфатени со исклучоците за работа во недела, членот 134 од Законот за работните односи предвидува најмалку 50% додаток за секој одработен час, освен ако е утврден повисок износ. Следува и неделен одмор во наредните седум дена.
Во јавниот сектор, членот 16 од Општиот колективен договор исто така предвидува 50% за недела и зголемување од 50% за одработените празнични часови, покрај надоместокот кога следува. Поповолните права од применливите договори треба да се земат предвид.
Во трговијата важи посебен режим. За работниците во дозволените исклучоци за работа во недела и на празници е предвиден додаток од најмалку 100%. Нивната пресметка не треба автоматски да се прави со процентите од општиот модел.
РАЦИН КАЛКУЛАТОР: осум часа работа
Табелите се ориентациски модели со основна бруто часовнина. Процентите се додаваат на истата основа, без последователно множење. Ноќна работа, прекувремени часови и други додатоци не се вклучени.
Модел 1: празник +50% и недела +50%
Се користи кога на работникот му следуваат двата додатока од 50%.
| Ставка / денари | 150/час | 200/час | 250/час | 300/час |
|---|---|---|---|---|
| Плата за 8 часа | 1.200 | 1.600 | 2.000 | 2.400 |
| Празник +50% | 600 | 800 | 1.000 | 1.200 |
| Недела +50% | 600 | 800 | 1.000 | 1.200 |
| Работа со додатоци | 2.400 | 3.200 | 4.000 | 4.800 |
| Надоместок, ако следува* | 1.200 | 1.600 | 2.000 | 2.400 |
| Вкупно со надоместокот* | 3.600 | 4.800 | 6.000 | 7.200 |
Модел 2: празник +100% и недела +100%
Се користи само кога применливиот режим ги предвидува двата одделни додатока од 100%. Ваква шема за недела што е и државен празник е прикажана за трговијата во стручниот билтен „Плата — ноември 2025“ на „Еуроконсалт плус“.
| Ставка / денари | 150/час | 200/час | 250/час | 300/час |
|---|---|---|---|---|
| Плата за 8 часа | 1.200 | 1.600 | 2.000 | 2.400 |
| Празник +100% | 1.200 | 1.600 | 2.000 | 2.400 |
| Недела +100% | 1.200 | 1.600 | 2.000 | 2.400 |
| Работа со додатоци | 3.600 | 4.800 | 6.000 | 7.200 |
| Надоместок, ако следува* | 1.200 | 1.600 | 2.000 | 2.400 |
| Вкупно со надоместокот* | 4.800 | 6.400 | 8.000 | 9.600 |
Во двата модела е претпоставено дека надоместокот следува и е еднаков на осум основни часа. Тоа не е автоматско право на дополнителна дневница на 11 октомври за секој работник. Надоместокот има своја основица; во приватниот сектор договорот упатува на просечната плата од последните 12 месеци. Ако не следува за конкретниот ден, се користи редот „Работа со додатоци“. Износите се бруто, пред придонеси и данок.
Проверете ги одделно 11 и 12 октомври
Надоместокот се утврдува според работната обврска и применливите прописи. За смените на 11 и 12 октомври побарајте одделна пресметка: кои часови се одработени, кои додатоци се признати и за кој ден е пресметан надоместокот. Надоместокот веќе вклучен во месечната плата не се додава повторно.
Работодавачот е должен при исплата да издаде писмена пресметка на платата. На неа проверете ги часовите, основицата, процентите и надоместоците.
Ако не е исплатено, каде да пријавите?
Побарајте писмено објаснување од работодавачот и зачувајте ги платната листа, распоредот и евиденцијата за часовите.
За сомневање за прекршено право можете да се обратите до Државниот инспекторат за труд, преку dit.gov.mk, на info@dit.gov.mk или 02/3 224 504. Во претставката наведете ги работодавачот, точната адреса и спорната исплата.
ССМ прима пријави на prijavi@ssm.org.mk, а овозможува и анонимно пријавување преку апликацијата „ССМ – мои работнички права“. Бесплатната правна помош е наменета за членовите на синдикатите здружени во ССМ.
