Кој е Јенс Киндберг и што стои зад планот за 1.000 станови во Скопје?

Јенс Киндберг, данскиот финансиски професионалец зад инвестициската група „Ваексткапитал“, ја проширува деловната структура во Македонија додека најавува портфолио од најмалку 1.000 станови во Скопје. Според информации во дел од медиумите, две нови градежни компании се поврзани со неговиот бизнис, кој веќе има искуство со изградба и издавање станови во Софија.

Неговата професионална биографија почнува во финансискиот сектор. Според корпоративната страница на „Ваексткапитал“, Киндберг завршил финансии и сметководство на Копенхашката бизнис-школа и работел на раководни позиции во „Никредит“, „ГЛГ партнерс“, „Ну ман инвестментс“ и „Скандиум асет менаџмент“. Компанијата наведува дека во 2014 година го основал своето прво друштво за развој на недвижности во Софија.

Данскиот специјализиран медиум „Биенс Ејендом“ ја опишува неговата кариера преку инвестициски фондови и преземања компании. „Ваексткапитал“ првично била основана во соработка со данската група „Дифко“, а Киндберг во 2022 година го откупил нејзиниот удел. Во април 2025 година „Ваексткапитал“ ја презела и „Дифко администрација“, компанија за администрирање инвестициски проекти, која тогаш имала 20 вработени.

Токму ова преземање дава контекст за големите бројки што го придружуваат претставувањето на групата. Данскиот медиум наведува дека „Дифко администрација“ низ годините администрирала 190 инвестициски проекти со вкупна вредност од 30 милијарди дански круни. Тоа е историска вредност на администрирани проекти, која сама по себе не го покажува личното богатство на Киндберг или средствата издвоени за Скопје.

Бугарското искуство покажува како функционира дел од неговиот бизнис со станови. „Форбс Бугарија“ во септември 2024 година објавил дека „СЕЕ резиденшал“ располага со шест имоти со вкупно 208 единици за издавање во Софија. Компанијата тогаш поставила цел да достигне 1.000 единици за издавање пред 2030 година, со поддршка од скандинавски инвеститори преку „Ваексткапитал“. Овие бројки се однесуваат на тогашното портфолио во Софија.

Во Македонија, новите компании се „Премиум Резиденце“ и „Рубик Тауер“, основани од истоимени дански друштва од Копенхаген. Киндберг е наведен како управител на двете македонски компании, регистрирани за изградба на згради.

Данските регистарски податоци, достапни преку деловниот сервис „Оунр“, ја потврдуваат сопственичката структура на нивните основачи. „Премиум резиденс АпС“ и „Рубик тауер АпС“ се основани на 9 септември 2026 година, со Томас Нилсен како директор. Нивен стопроцентен сопственик е „ВК Скопје девелопмент АпС“, основана во декември 2023 година. Неа, пак, целосно ја поседува луксембуршката „Ваекст холдингс“.

За обемот на купувањата во Скопје, групата во февруари годинава за Телма потврдила дека купила 250 станови во изградба и дека до крајот на 2026 година планира да купи уште најмалку толку. Целта била да достигне најмалку 1.000 станови „за кратко време“. Според извештајот, купувањето во рана фаза на изградба овозможува пониски цени, а соработката се одвива преку локални агенции и директно со инвеститори.

„Досега, лично инвестирав сопствени средства во Северна Македонија, бидејќи секогаш инвестирам прво јас пред да поканам инвеститори“, изјавил Киндберг за Телма. Тогаш најавил дека во текот на годината очекува да почне да вклучува и други инвеститори.

Неговата деловна историја содржи и регулаторни забелешки. Данскиот финансиски регулатор „Финанстилсинет“ на 15 декември 2025 година наложил корекции на „Софија резиденшал“ и „СЕЕ резиденшал“ поради заведувачко рекламирање очекувани приноси. Првата рекламирала годишен принос над 40 отсто, додека умереното сценарио во документот за инвеститорите наведувало 12,57 отсто. Кај втората, рекламираниот принос надминувал 20 отсто, наспроти 11,70 отсто во документот. Регулаторот утврдил и погрешни пресметки на ризиците и сценаријата и побарал отстранување на заведувачките реклами и исправка на документите.

„Ејендомсвоч“, известувајќи за одлуките, наведува дека Киндберг ги основал овие компании, но дека тие веќе биле во сопственост на поширок круг дански инвеститори. Регулаторните наоди се однесуваат на нивните инвестициски производи и рекламирање.

За скопското портфолио останува неодговорено прашањето што ќе се случува со становите по завршувањето на изградбата. Во февруарскиот извештај Телма наведува дека групата не одговорила дали ќе ги препродава или ќе ги издава. Бројката од 1.000 станови е најавена цел, додека информацијата за 250 купени станови се темели на потврдата што компанијата ја дала во февруари.