Skip to content
Српската обложувалница „Меридијан бет“ објави понуда за обложување за вонредните парламентарни избори закажани за 25 октомври, позиционирајќи ја коалицијата на поранешниот претседател Александар Вучиќ како фаворит наспроти повеќето независни анкети.
Според понудата на оваа обложувалница, прагот за освоени гласови на листата „Обединета Србија“, предводена од Вучиќ, е поставен на 46,2 проценти, додека за „Студентската листа“ проектираниот праг изнесува 39,05 проценти. Единствена друга политичка опција за која е поставена квота е Социјалистичката партија на Србија на Ивица Дачиќ со граница од 3,75 проценти, додека останатите партии воопшто не се предвидува да го поминат изборниот праг од три отсто.
Ваквата проценка на обложувалницата доаѓа во период кога релевантните јавни мерења на јавното мислење покажуваат поинаква слика на теренот. Истражувањата спроведени во текот на годината од страна на ЦРТА во соработка со Универзитетот Стенфорд, како и на Нова српска политичка мисла, покажаа водство на „Студентската листа“ пред владејачката опција со предност која варира меѓу 2,1 и 9,2 процентни поени. Спротивно на нив, само агенцијата „Фактор плус“ континуирано регистрира висока предност за Српската напредна партија.
Политичкиот аналитичар и истражувач на Нова српска политичка мисла, Ѓорѓе Вукадиновиќ, оценува дека во случајот со изборите во Србија, обложувалниците помалку се водат од класични обложувачки правила, а повеќе од политички маркетинг во корист на власта. Тој посочува дека целта на ваквите понуди е да се создаде перцепција во јавноста што нема да го загрози резултатот на власта, туку напротив, ќе го поддржи.
Според математичките пресметки врз основа на претходните парламентарни избори, за листата на Вучиќ да го надмине поставениот праг од 46,2 проценти при проектирана излезност од 64,5 отсто, би било потребно да освои најмалку 130.000 гласови повеќе во споредба со изборите од 2023 година.
Вукадиновиќ посочува дека поставениот праг за излезност од 64,5 отсто реално предвидува поголем одѕив на гласачите, но сепак ја држи границата под 70 проценти, ниво кое аналитичарите го сметаат за директен индикатор за пораз на актуелната власт. Во исто време, за изборното обложување е воведен и лимит на максимална уплата од приближно 100 евра по тикет, што вообичаено служи за заштита на обложувалницата од финансиски ризици.
Во српската јавност веќе подолго време се отвора прашањето за блиските релации меѓу „Меридијан“ и владејачките структури. Медиумските истражувања претходно укажаа дека високиот функционер на Српската напредна партија, Владимир Ѓукановиќ, во минатото работел како правник во оваа компанија, а подоцна заедно со тогашниот директор на групацијата бил поставен во раководството на Државната лотарија на Србија.
