Skip to content
Американските преговарачи Џаред Кушнер и Стив Виткоф предложиле Европа да го зголеми купувањето руски гас, а Украина да го обнови транзитот како дел од можен мировен договор. Ова го објави „Њујорк тајмс“, повикувајќи се на извори запознаени со разговорите, пренесува „Индекс“.
Според извештајот, американските пратеници ја претставиле идејата пред европски и украински функционери, вклучително и пред Володимир Зеленски. Нивниот аргумент бил дека Украина повторно би добивала приходи од транзит, а европските потрошувачи би имале пристап до поевтина енергија. Европските претставници во разговорите реагирале негативно на предлогот.
Белата куќа соопштила дека работи со Украина и европските партнери на мировен предлог со економски поттикнувања за двете страни. Рускиот економски пратеник Кирил Дмитриев, пак, најавил дополнителни иницијативи во соработката со Вашингтон по договорот за руски дизел.
Предлогот е спротивен на усвоената европска насока за прекинување на зависноста од руските енергенти. Советот на ЕУ на 26 јануари годинава ја одобри регулативата за постепено запирање на увозот на руски гас, со преодни рокови за постојните договори. Целосната забрана за течниот природен гас е предвидена од почетокот на 2027 година, а за гасот преку гасоводи од есента 2027 година.
Ројтерс на 8 октомври објави дека американски и руски претставници разговарале и за вклучување американски инвеститор во „Северен тек“. Белата куќа тогаш негираше дека неодамна имало разговори за гасоводот, а германското Министерство за економија порача дека неговото повторно отворање бара владино одобрение и не е посакувано. Засега нема објавен договор за реализација на предлогот за зголемени руски испораки.
