Skip to content
СДСМ го обвини премиерот Христијан Мицкоски дека избегнува директно да одговори на изјавите на бугарскиот министер Иван Демерџиев, кој македонските власти ги нарече „српски“, поради неговите наводни политички и деловни врски со српскиот претседател Александар Вучиќ.
Од партијата ја осудија изјавата на Демерџиев, кој рече дека Бугарија нема да ја бара ниту да ја предаде Ива Михаилова на „српските власти“, наместо на македонските. СДСМ реагира и на изјавата на бугарскиот амбасадор Жељазко Радуков, кој изрази сомневање дека македонските институции не знаеле за заминувањето на Михаилова од државата.
Реакцијата следува откако Мицкоски, запрашан за изјавите на бугарските функционери, рече дека има што да одговори, но дека тие не заслужуваат внимание.
Од СДСМ тврдат дека причината за ваквиот став се блиските односи на Мицкоски со Вучиќ и политичките, медиумските и деловните интереси што, според партијата, ги поврзуваат двете власти.
Во соопштението се изнесуваат и обвиненија за наводно влијание на српските безбедносни структури, поврзаност со медиуми блиски до власта во Белград, како и за деловни интереси во енергетиката, банкарството и други сектори.
СДСМ посебно ги споменува српската Алта банка и деловните активности поврзани со трговијата со електрична енергија, тврдејќи дека постојат интереси поради кои Мицкоски избегнува конфронтација со Белград.
За овие обвинувања во доставеното соопштение не се приложени докази што би ги потврдиле наводните политички и деловни поврзаности.
„ВМРО е инструмент, Мицкоски е изведувачот, а Вучиќ е диригентот“, наведуваат од СДСМ, оценувајќи дека молчењето на премиерот за изјавата на Демерџиев е поврзано со неговите односи со српските власти.
Македонското Министерство за надворешни работи, пак, вчера официјално реагираше на изјавите на Демерџиев и Радуков. Во Министерството беше повикан претставник на бугарската амбасада, кому му беше пренесено незадоволството на македонската страна поради, како што беа оценети, навредливите и провокативни изјави.
Мицкоски денеска изјави дека не сака дополнително да ги коментира настапите на бугарските функционери, оценувајќи дека се поврзани со политичките случувања во Бугарија.
Од СДСМ сметаат дека премиерот избегнува директен политички одговор и најавуваат дека ќе продолжат да ги отвораат прашањата за неговите односи со српските политички и деловни структури.
