Skip to content
Александар Вучиќ оцени дека светот се движи кон голем воен судир, поврзувајќи ја својата загриженост со зголемените вложувања на европските држави во одбраната. Во разговор со руската новинарка Ксенија Собчак, тој изнесе песимистичка процена дека трета светска војна е неизбежна, пренесе „Индекс“.
Вучиќ посочи дека европските земји ги зајакнуваат своите воени капацитети и издвојуваат големи средства за вооружување. Како примери ги наведе скандинавските држави, особено Шведска, оценувајќи дека нивната воена моќ постојано расте.
Зборувајќи за натрупувањето оружје, се повика на познатото драматуршко правило на Антон Чехов — пушката што се појавува во првиот чин подоцна ќе испука. Со таа споредба ја образложи својата загриженост дека засиленото вооружување може да заврши со воен судир.
Тој се осврна и на проширувањето на германската воена индустрија, наведувајќи го „Рајнметал“ како пример. Според неговите тврдења, компанијата значително ја зголемила добивката поради побарувачката за воена опрема. Европските влади, пак, зголемените трошоци за одбрана ги објаснуваат со потребата од заштита од Русија.
И покрај уверувањето дека меѓународната ситуација се движи во опасна насока, Вучиќ рече дека би сакал неговата процена да се покаже како погрешна.
„Би бил најсреќниот човек кога би згрешил, но се плашам дека сум во право“, рече тој.
Ова не е негово прво предупредување за можен глобален конфликт. Во интервју за „Берлинер цајтунг“ во март годинава, Вучиќ оцени дека спречувањето трета светска војна ќе биде тешко, посочувајќи ги регионалните војни, борбата за ресурси и спротивставените интереси на големите сили како извори на дополнителна ескалација.
