Грција затвора 187 воени кампови и ќе заштеди 100 милиони евра годишно

Грција планира да затвори 187 од вкупно 831 воени кампови како дел од ажурираната структура на вооружените сили за периодот 2026-2035 година.

Министерот за одбрана Никос Дендиас ги презентираше плановите пред членовите на парламентарната постојана комисија за национална одбрана и надворешни работи на состанок зад затворени врати. Тој ги нагласи можностите за заштеди со спојување на воени единици и кампови, како и важноста од имплементација на нови технологии.

Според изворите, воените локации планирани за затворање немаат повеќе од 30% од потребниот персонал, а нивното оперативно значење е оценето како ограничено, објави „Катимерини“.

Се очекува реформата да обезбеди заштеди од околу 100 милиони евра годишно и вкупно 1,7 милијарди евра во текот на една деценија. Средствата ќе бидат насочени кон програма за домување на воен персонал и мали програми за набавка на воена опрема.

Во исто време, екипирањето на клучните воени формации би можело да достигне речиси 70% од потребниот персонал во мирно време.

Ажурираниот план предвидува и создавање нови единици специјализирани за сајбер безбедност, електронска интелигенција, вселенска технологија и човечка интелигенција.

Предвидува и изградба на повеќеслоен систем за воздушна одбрана, познат како „Ахилов штит“.