Skip to content
Србите од Косово од рано утрово со автомобили и автобуси патуваат кон гласачките места во Србија, создавајќи долги колони на премините Јариње, Брњак и Мердаре. На Јариње дел од граѓаните преминуваат и пеш, додека возачите пријавуваат чекање подолго од еден час. Тие се упатуваат на гласање на денешните предвремени парламентарни избори.
Според „Косово онлајн“, граѓани во колоната на Јариње раскажале дека возила пристигнуваат уште од 3 часот наутро. Танјуг, повикувајќи се на ТВ Мост, известува за голем метеж и на Брњак, од правец на Косово кон Србија.
На Мердаре се отворени две ленти, но и таму утрово е формирана подолга колона. Најголемиот дел од избирачите патуваат со приватни автомобили, а од одделни места во централно Косово се упатиле и автобуси. Дел од нив одат кон Рача, кај Куршумлија, каде гласањето започнало во 7 часот.
Според одлуката на Републичката изборна комисија што ја пренесува Танјуг, за избирачите од Косово гласањето е организирано на определени места во Врање, Куршумлија, Рашка и Тутин. Автобуси и автомобили тргнале од северниот дел на Косово, но и од Грачаница, Штрпце и Косовското Поморавје.
Редици се создавале и пред самите гласачки места. Пред средното училиште „Кралица Јелена“ во Рашка, каде гласаат избирачи од Северна Митровица, околу педесет луѓе чекале веќе во 6:30 часот. Граѓаните пристигнувале пред отворањето и во Рудница, каде гласаат избирачи од Лепосавиќ.
Гласачките места се отворени до 20 часот. Во Србија денес се избираат 250 пратеници, а на гласачкото ливче има 18 изборни листи.
