Skip to content
Карлос Алкарас со атрактивни поени и неизвесна завршница го совлада Карен Хачанов со 6:4 и 7:6 во првото коло на турнирот во Виена. Шпанецот на 27 октомври победи по два часа и четири минути игра, во својот прв настап на овој турнир по 2021 година.
Вториот носител мораше да надоместува брејк-негатива во првиот сет, а уште поголема драма следуваше во вториот. При водство од 5:4 пропушти три меч-топки на сервис на противникот, по што го загуби сопствениот сервис и му овозможи на Хачанов да сервира за израмнување во сетови.
Алкарас веднаш возврати со брејк и го одведе сетот во тајбрејк. Таму се врати од негатива од 1:3 и славеше со 7:5, избегнувајќи решавачки трет сет. Со победата ја продолжи совршената серија против Хачанов, против кого сега води со 7:0.
Покрај резултатската неизвесност, мечот донесе и впечатливи размени. „Тенис ТВ“ објави неколку од најатрактивните поени, меѓу кои и ситуации во кои Шпанецот со брза промена од одбрана во напад ја добиваше размената.
По дуелот Алкарас ја пофали атмосферата на исполнетите трибини и призна дека морал напорно да се бори за победата. За пропуштените меч-топки оцени дека избрзал со неколку удари, но останал задоволен од нивото на играта и од начинот на кој се вратил во завршницата.
