Хорор за Ноќ на вештерките во САд, три пукања во Далас однесоа четири животи

Четири лица загинале, а 15 се повредени во три одделни пукања во Далас, во ноќта меѓу 31 октомври и 1 ноември. Насилството се случило во квартот Дип Елам, познат по баровите, рестораните и ноќниот живот, додека граѓаните ја прославувале Ноќта на вештерките.

Според првичната полициска истрага, пукањата биле пријавени на три различни локации, околу 00:20, 01:05 и 01:35 часот по локално време. Дел од повредените биле пренесени во болници. Нема повредени полицајци.

Истражителите сè уште утврдуваат дали инцидентите се поврзани и што им претходело. Началникот на полицијата изјавил дека се вршат распити за да се утврди улогата на лицата што се наоѓаат во полициски притвор, без да објави детали за нивниот идентитет или евентуалните обвиненија.

Полицијата имала засилено присуство во квартот поради очекуваната посетеност за празникот. Истражителите побарале од сведоците да достават снимки и фотографии што би помогнале да се реконструираат настаните.

Пукањата во Далас беа дел од повеќе насилни инциденти во САД за време на празничниот викенд. Во Бирмингем, Алабама, едно лице загинало, а осум се ранети во близина на стадион, по натпревар во американски фудбал.

Во Њуарк, Делавер, шест лица биле застрелани и пренесени во болници. Во Блумингтон, Илиноис, загинала 19-годишна жена, друга жена е во критична состојба, а уште шест лица се повредени. Во Фејетвил, Арканзас, шест лица биле хоспитализирани со прострелни рани.