Skip to content
Четири лица загинаа, а 88 се повредени при судир на возови на 8 ноември во реонот Ел Ајат, во египетската област Гиза, соопшти Министерството за здравство. Несреќата предизвика излетување вагони од шините и прекин на железничкиот сообраќај меѓу Каиро и јужниот дел на земјата.
Според египетската железничка управа, возот број 134, кој сообраќал од Гиза кон Фајум, удрил во задниот дел на возот број 2010, на релацијата Каиро кон Асуан. Судирот се случил меѓу станиците Кафр Амар и Рака, при што четири вагони излетале од шините.
Во спасувањето и транспортот на повредените учествувале 72 амбулантни возила. Според најновите податоци што ги пренесоа египетските медиуми, 49 повредени биле пренесени во болницата Ал Васта, 29 во болницата во Ел Ајат, а десетмина во Атфих. Здравствените установи во областите Гиза и Бени Суеф ја зголемиле подготвеноста за прием на пациенти.
Првичните извештаи зборуваа за најмалку 60 повредени. Подоцна Министерството за здравство го зголеми билансот на 88 повредени и потврди четири смртни случаи, нагласувајќи дека станува збор за прелиминарни податоци.
Претседателот Абдел Фатах ел Сиси побара брзо испитување на околностите и одговорност за секого кај кого ќе се утврди пропуст. Министерството за транспорт обезбедило автобуси за превоз на патниците на делови од прекинатата железничка линија.
Железничките екипи испратиле кранови и тешка механизација за отстранување на оштетените вагони. Формирана е и техничка комисија која треба да ги испита причините за несреќата и состојбата на пругата.
