Skip to content
Суд во Загреб одреди едномесечен притвор за четворица медицински техничари осомничени за тешко убиство на 32-годишен пациент. Кристијан Јосип Периш, поранешен атлетичар и долгогодишен тренер, почина на 21 октомври во загрепската Клиника за психијатрија „Свети Иван“.
Според загрепската полиција, Периш лежел на кревет и бил делумно врзан со ремени. Кога се обидел да се ослободи и да стане, четворицата техничари, според сомнежите, го задржувале со сила. Обвинителството се сомнева дека постапиле спротивно на правилата на медицинската струка и му нанеле повеќе повреди. Точната причина за смртта сè уште не е јавно соопштена.
Судот го одреди притворот на 8 ноември поради опасност од влијание врз сведоците и повторување на делото, како и поради особено тешките околности на случајот за кој се води истрагата.
Директорката на клиниката Мајда Грах соопшти дека во тек е постапката за вонреден отказ на тројца вработени. Таа рече дека клиниката побарала извештаи за внатрешна проверка, ги известила надлежните институции и соработува со истражителите.
Во понеделникот, колеги на осомничените протестираа пред клиниката во знак на поддршка и побараа побезбедни услови за работа. Според ХРТ, управата ги прифатила барањата за обуки за постапување во ризични ситуации и за ангажирање обезбедување.
